មន្ត្រីបង់ក្លាដេសនិយាយនៅថ្ងៃពុធនេះថា ចំនួនអ្នកស្លាប់ដោយសារការបាក់ដីបណ្តាលមកពីភ្លៀងខ្លាំងនៅតាមតំបន់ជើងភ្នំនិងខ្ពង់រាបកើនដល់១៣៤នាក់។
នៅក្នុងប្រទេសបង់ក្លាដេសពេលដែលមានភ្លៀងតែងមានព្យុះ និង បង្កឲ្យមានការបាក់ដី នៅក្នុងរដូវវស្សា ដែលបានបំផ្លាញផ្ទះ និង សម្លាប់ពលរដ្ឋ។
មន្ត្រីគ្រប់គ្រងគ្រោះមហន្តរាយបង់ក្លាដេសឲ្យដឹងថា ភ្លៀងខ្លាំងនៅតំបន់ខ្ពង់រាបចំនួនបី នៅភាគខាងអាគ្នេយ៍កាលពីព្រឹកថ្ងៃអង្គារម្សិលមិញ បានសម្លាប់មនុស្ស៩៨នាក់នៅ Rangamati សម្លាប់៣០នាក់នៅ Chittagong និង សម្លាប់៦នាក់នៅតំបន់ Bandarban។ នេះបើតាមសារព័ត៌មាន Channel News Asia។
សមត្ថកិច្ចអះអាងថា ចំនួនអ្នកស្លាប់អាចកើនឡើងទៀត ព្រោះមនុស្សជាច្រើនទៀតកំពុងបាត់ខ្លួន ហើយក្រុមជួយសង្គ្រោះកំពុងបន្តស្វែងរក។ របាយការណ៍បង្ហាញថា ក្នុងចំណោមអ្នកស្លាប់ទាំងនោះក៏មានយោធា ដែលជាអ្នកទៅជួយសង្គ្រោះផងដែរ៕