រដ្ឋមន្ត្រីក្រសួងយុត្តិធម៌អាមេរិកលោក Jeff Sessions ថ្លែងនៅថ្ងៃអង្គារម្សិលមិញប្រាប់សមាជិកព្រឹទ្ធសភាថា ការដែលចោទលោក ត្រាំថា មានការផ្សំគំនិតជាមួយរុស្ស៊ីបន្លំការបោះឆ្នោតនោះ គឺជាការកុហកដែលមានលក្ខណៈគួរឲ្យស្អប់ខ្ពើម។
នៅក្នុងពេលផ្តល់សក្ខីកម្មនៅក្នុងព្រឹទ្ធសភា លោក Sessions បានច្រានចោលរាល់ការចោទប្រកាន់ទាំងឡាយណា ដែលថាមន្ត្រីរបស់លោកត្រាំ បានជួបជាមួយ អ្នកការទូតរបស់រុស្ស៊ីក្នុងការរៀបចំផែនការដូរទិន្នន័យការបោះឆ្នោតកាលពីចុងឆ្នាំ២០១៦។ នេះបើតាមទីភ្នាក់ងារព័ត៌មានAFP។
លោក Sessions ថ្លែងថា រូបលោកមិនដែលបានជួបជាមួយមន្ត្រីរុស្ស៊ី ឬ មន្ត្រីការទូតបរទេសណាមួយឲ្យជួយជ្រៀតជ្រែកដល់ដំណើរការឃោសនារកសំឡេងឆ្នោតឲ្យលោកត្រាំនោះទេ។លោក បានថ្លែងបែបនេះទៅគណៈកម្មាធិការចារកម្មនៃព្រឹទ្ធសភា។
លោក Sessions ទើបបានបង្ហាញមុខជាសាធារណៈលើកដំបូងក្នុងការផ្តល់សក្ខីកម្មនេះ ចាប់តាំងពីលោកស្បថចូលកាន់តំណែងជារដ្ឋមន្ត្រីក្រសួងយុត្តិធម៌កាលពីខែកុម្ភះមក ។
លោក James Comey ប្រធាន FBI ដែលត្រូវបានបណ្តេញចេញពីតំណែងអះអាងថា មានជាប់ពាក់ព័ន្ធរវាងក្រុមការងារលោកត្រាំ និង រុស្ស៊ីក្នុងការលួយកែប្រែទិន្នន័យការបោះឆ្នោតកាលពីចុងឆ្នាំ២០១៦កន្លងទៅ៕