មនុស្ស១២នាក់ស្លាប់ពេលឆេះអគារនៅទីក្រុងឡុងដ៍

សមត្ថកិច្ចបង្ហាញរបាយការណ៍ថា មនុស្ស១២នាក់បានស្លាប់ក្នុងហេតុការណ៍ភ្លើងឆេះអគារខនដូ នៅភាគខាងលិចនៃទីក្រុងឡុងដ៍ កាលពីថ្ងៃពុធម្សិលមិញ៕

ភ្លើងបានឆេះ អគារដែលចាប់ពីជាន់ទី២កាលពីម្សិលមិញ ហើយរាលដាល ទៅជាន់ផ្សេងៗទៀតក្នុងចំណោម២៤ជាន់។ ប្រជាពលរដ្ឋដែលរស់នៅទីនោះមានប្រមាណ​ពី៦០០ទៅ៨០០នាក់។​ នេះបើតាមសារព័ត៌មាន Channel News Asia។

ពេលកំពុងឆេះនោះឪពុកម្តាយជា ច្រើនបានយកកន្សែងសើមរុំកូនរបស់ពួកគេ ហើយរត់គេចចេញ ពីកន្លែងដែលមានភ្លើងឆេះខ្លាំង និង ហៅឲ្យក្រុមជួយសង្គ្រោះជួយពួកគេ។​

របាយការណ៍សមត្ថកិច្ចបង្ហាញថា មនុស្សប្រមាណ​៧០ទៅ៨០នាក់កំពុងសង្គ្រោះនៅក្នុងមន្ទីរពេទ្យ ហើយក្នុងនោះប្រមាណ១៨នាក់ កំពុងស្ថិតនៅក្នុងស្ថានភាពធ្ងន់ធ្ងរ៕