រដ្ឋមន្ត្រីការបរទេសអាមេរិក លោក Rex Tillerson ថ្លែងនៅថ្ងៃពុធម្សិលមិញថា លោកត្រូវឲ្យមានការជួយសហការបន្ថែមទៀតពីប្រទេសចិន ក្នុងការដាក់សម្ពាធលើប្រទេសកូរ៉េខាងជើង ដើម្បីដោះស្រាយបញ្ហាអាវុធនុយក្លេអ៊ែ និង បញ្ហាផ្សេងៗជាច្រើនទៀត។
លោក Rex Tillerson ថ្លែងបែបនេះ នៅក្នុងពេលប្រជុំសភា ដែលជជែកពីបញ្ហាកូរ៉េខាងជើង ហើយទីក្រុងវ៉ាស៊ីនតោន ត្រូវសហការជាមួយសម្ព័ន្ធមិត្តនានាស្វែងរកដំណោះស្រាយ។ នៅសប្តាហ៍ក្រោយចិន និង អាមេរិក ពិភាក្សាកម្រិតខ្ពស់លើបញ្ហាសហប្រតិបត្តិការ។នេះបើតាមទីភ្នាក់ងារព័ត៌មានរ៉យទ័រ។
ចិនគឺជាមិត្តស្និទ្ធជាមួយ ជាមួយកូរ៉េខាងជើង ខណៈកូរ៉េខាងជើងត្រូវបានអង្គការសហប្រជាជាតិដាក់ទណ្ឌកម្មម្តងហើយម្តងទៀត ហើយត្រូវប្រទេសនានាលើពិភពលោកផ្តាច់ទំនាក់ទំនងការទូត។
សហរដ្ឋអាមេរិកធ្លាប់បញ្ជាក់ជំហរថា នឹងប្រឹងប្រែងគ្រប់មធ្យោបាយដើម្បីចរចាដោះស្រាយបញ្ហាអាវុធនុយក្លេអ៊ែរបស់កូរ៉េខាងជើង ប៉ុន្តែថា ក្នុងករណីចាំបាច់តម្រូវនឹងប្រើកម្លាំងទ័ពដើម្បីដោះស្រាយបញ្ហាទាំងនោះ៕
