ទីក្រុងនៅភាគខាងត្បូងហ្វីលីពីនត្រូវឡោមព័ទ្ធបន្តទៀត

កងកម្លាំងប្រដាប់អាវុធរបស់ហ្វីលីពីនបានថ្លែងថា ទីក្រុងម៉ារ៉ាវី នៅភាគខាងត្បូងត្រូវឡោមព័ទ្ធអូសបន្លាយយូរទៀតដោយមិនកំណត់ ដោយសារ ក្រុងនេះនៅតែបន្តរងការគំរាមកំហែងពីពួកក្រុមឧទ្ទាម សហការជាមួយក្រុម IS។​

ទីក្រុងមួយនេះ ត្រូវបានឡោមព័ទ្ធ៤សប្តាហ៍មកហើយ។ នៅក្នុងសន្និសីទកាលពីថ្ងៃទី១៤ខែមិថុនា កម្លាំងទ័ពហ្វីលីពីនថ្លែងថា ដំបូងឡើយពួកគេគ្រោងបោសសំអាត ក្រុមឧទ្ទាមឲ្យអស់ត្រឹមថ្ងៃទី១២ខែមិថុនា ប៉ុន្តែថា ឥឡូវត្រូវការពេលច្រើនទៀតដោយមិនកំណត់។​ នេះបើតាមសារព័ត៌មាន Channel News Asia។​

កម្លាំងហ្វីលីពីនបារម្ភថា ពេលកងទ័ពបន្ធូរដៃនៅទីនោះ នឹងមានការវាយប្រហារជាថ្មីទៀតពីក្រុមឧទ្ទាម នាំឲ្យមានគ្រោះថ្នាក់ជាថ្មីទៀត។​

ទីក្រុងម៉ារ៉ាវី ស្ថិតនៅលើកោះមួយក្នុងចំណោមកំរងកោះផ្សេងទៀត នៅក្នុងកោះមិនដាណាវនៅភាគត្បូងនៃប្រទេសហ្វីលីពីន។

អ្នកវិភាគបញ្ហាសង្គមលើកឡើងថា នេះគឺជាកំហុសមួយដែលបង្ហាញថា រដ្ឋាភិបាលហ្វីលីពីនមិនបានដឹងច្បាស់ ពីភាពខ្លាំងរបស់ក្រុមបះបោរ៕