កូនប្រុសនាយករដ្ឋមន្ត្រីសិង្ហបុរី Lee Hsien Loong គឺលោក Li Hongyi ថ្លែងនៅថ្ងៃព្រហស្បតិ៍ម្សិលមិញថា លោកមិនមានចំណង់ចំណូលចិត្តធ្វើនយោបាយទេ គឺការថ្លែងបែបនេះ បន្ទាប់ពី មីង និង ពូរបស់លោក ចោទថា នាយករដ្ឋមន្ត្រី បច្ចុប្បន្នកំពុងរៀបចំឲ្យកូនប្រុសរបស់គាត់បន្តតំណែង។
លោក Li Hongyi សរសេរនៅលើហ្វេសប៊ុករបស់លោកថា លោកត្រូវការតម្លៃពិត ហើយមិនចូលចិត្តក្នុងការធ្វើនយោបាយនោះទេ។ នេះបើតាមសារព័ត៌មាន Channel News Asia។
កាលពីថ្ងៃពុធ ម្តាយមី និង ឪពុកមារបស់លោកគឺលោកស្រីវេជ្ជបណ្ឌិត Lee Wei Ling និង លោក Lee Hsien Yang ថ្លែងជាសាធារណៈថា ពួកគេបាត់បង់ទំនុកចិត្តលើបងប្រុសរបស់ខ្លួនគឺលោកនាយករដ្ឋមន្ត្រីលី ដោយពួកគេថ្លែងថា លោកនាយករដ្ឋមន្ត្រីលី និង ភរិយារបស់លោកគឺលោកស្រី ហូ ចីង មានមហិច្ឆតានយោបាយ រៀបចំតំណែងនាយករដ្ឋមន្ត្រីទុកឲ្យកូនប្រុសរបស់ខ្លួនគឺលោក Li Hongyi។
ជាការឆ្លើយតបនាយករដ្ឋមន្ត្រីលី បានថ្លែងថា លោកមានការអាក់អន់ចិត្តយ៉ាងខ្លាំង ដែលបងប្អូនបង្កើតរបស់ខ្លួន យកបញ្ហាគ្រួសារទៅថ្លែងវាយប្រហារជាសាធារណៈ ហើយលោកបានច្រានចោលការចោទប្រកាន់ទាំងនេះ។
បច្ចុប្បន្នមានវ័យ៣០ឆ្នាំ លោក Li Hongyi កំពុងបម្រើការងារឲ្យទីភ្នាក់ងារបច្ចេកវិទ្យារដ្ឋាភិបាលសិង្ហបុរី ហើយលោកក៏ទើបចាប់ផ្តើមការងារថ្មីជាមួយក្រុមហ៊ុន Google ជាអ្នកគ្រប់គ្រងការផលិត បន្ទាប់ពីបញ្ចប់ការសិក្សានៅវិទ្យាស្ថានបច្ចេកវិទ្យាម៉ាស្យាជូសេតនៃសហរដ្ឋអាមេរិក៕