ពលរដ្ឋពេញទៅដោយកំហឹង បានស្រែកខ្លាំងដាក់នាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ និងបានសម្រុកចូលទីស្នាក់ការអាជ្ញាធរមូលដ្ឋានកាលពីថ្ងៃម្សិលមិញនេះ ខណៈដែលពួកគេទាមទាររកយុត្តិធម៌សម្រាប់ជនរងគ្រោះដែលស្លាប់ក្នុងគ្រោះអគ្គីភ័យនៅអគារមួយក្នុងទីក្រុងឡុងដ៍ ដែលបានសម្លាប់មនុស្ស ៣០នាក់ ហើយរាប់សិបនាក់ទៀតបាត់ខ្លួន។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
AFP ផ្សាយបន្តថា អ្នកស្រី ម៉េយ៍ ត្រូវបានគេរិះគន់ចំពោះការគេចវេសពីប្រជាជន នៅពេលអ្នកស្រីទៅមើលអគារកម្ពស់ ២៤ជាន់ឈ្មោះ Grenfell កាលពីថ្ងៃព្រហស្បតិ៍កន្លងមកនេះ ប៉ុន្តែ បានជួបនឹងប្រជាជនដែលស្រែកដាក់អ្នកស្រី។
មន្ត្រីប៉ូលិសរាប់សិបនាក់បានរារាំងមហាជនពោរពេញដោយកំហឹងទាំងនោះ និងបានផ្ទុះភាពរញ៉េរញ៉ៃ ខណៈរថយន្តដឹកអ្នកស្រី ម៉េយ៍ បានចាកចេញពីវិហារមួយនៅទីនោះ ជាទីដែលអ្នកស្រីបានជួបជាមួយអ្នកនៅរស់រានមានជីវិត ពលរដ្ឋ និងអ្នកស្ម័គ្រចិត្ត ហើយបានសន្យាផ្ដល់មូលនិធិថ្មីសម្រាប់អ្នករងគ្រោះ។
កំហឹងក៏បានផ្ទុះឡើងនៅខាងក្រៅការិយាល័យក្រុមប្រឹក្សា Kensington និង Chelsea ផងដែរ ដែលស្ថាប័នទាំងពីរនេះទទួលខុសត្រូវគ្រប់គ្រងគេហដ្ឋានមួយនេះ៕