ប៉ូលិសអង់គ្លេស បាននិយាយនៅថ្ងៃនេះថា អគ្គីភ័យដែលបានឆាបឆេះអគារលំនៅឋានមួយនៅទីក្រុងឡុងដ៍ក្នុងសប្ដាហ៍នេះ បានសម្លាប់មនុស្សយ៉ាងហោចណាស់ ៥៨នាក់ ខណៈដែលនាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ បានទទួលស្គាល់ថា ការឆ្លើយតបទៅនឹងអគ្គីភ័យនោះពីសំណាក់អាជ្ញាធរ មិនបានល្អគ្រប់គ្រាន់នោះឡើយ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
ដោយសារតែកំណើននៃកំហឹងចំពោះការដោះស្រាយបញ្ហាអគ្គីភ័យរបស់រដ្ឋាភិបាលនោះ អ្នកស្រី ម៉េយ៍ បានជួបជាមួយពលរដ្ឋរស់នៅក្នុងអគារ Grenfell និងបានសន្យាជួយដល់ជនរងគ្រោះ ខណៈដែលក្រុមបាតុករបានប្រមូលផ្ដុំគ្នាតវ៉ានៅតាមផ្លូវនានាជុំវិញគេហដ្ឋានរបស់អ្នកស្រី ម៉េយ៍ អស់រយៈពេល ២ថ្ងៃហើយ។
ដោយទើបតែឆ្លងផុតការបោះឆ្នោតកាលពីចុងសប្ដាហ៍មុននោះ អ្នកស្រី ម៉េយ៍ បានរងការរិះគន់ចំពោះការឆ្លើយតបទៅនឹងអគ្គីភ័យនោះ ហើយបានរួតរះគេចចេញពីប្រជាពលរដ្ឋកាលពីថ្ងៃសុក្រកន្លងមក ក្រោមការការពារយ៉ាងតឹងរឹងពីសំណាក់កម្លាំងប៉ូលិស ខណៈដែលក្រុមបាតុករស្រែកដាក់អ្នកស្រីថា “ថោកទាប”។
មេប៉ូលិសទីក្រុងឡុងដ៍ លោក Stuart Cundy បាននិយាយថា ចំនួនអ្នកស្លាប់ ៥៨នាក់ គឺជាមនុស្សដែលកំពុងបាត់ខ្លួន ហើយត្រូវបានគេសន្និដ្ឋានថា បានស្លាប់នៅក្នុងអគ្គីភ័យនោះ ដែលបានឆាបឆេះអគារលំនៅឋានកម្ពស់ ២៤ជាន់ ខណៈដែលពលរដ្ឋលង់លក់ក្នុងដំណេកនៅព្រឹកព្រលឹមថ្ងៃពុធ៕
