មេដឹកនាំបក្សប្រឆាំងម៉ាឡេស៊ីដែលកំពុងជាប់ឃុំ លោក អាន់វ៉ា អ៊ីប្រាហ៊ីម បាននិយាយកាលពីថ្ងៃម្សិលមិញថា លោកនឹងមិនឈរឈ្មោះជាបេក្ខជននាយករដ្ឋមន្ត្រី នៅក្នុងការបោះឆ្នោតដែលគ្រោងធ្វើនៅពាក់កណ្ដាលឆ្នាំ២០១៨នោះទេ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
ដោយធ្លាប់ជាតារារះត្រដែតនៅក្នុងបក្សកាន់អំណាច UMNO លោក អាន់វ៉ា ត្រូវបានគេចាត់ទុកជាកម្លាំងគំរាមនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ និងក្រុមសម្ព័ន្ធរបស់លោក បន្ទាប់ពីលោក អាន់វ៉ា បានដឹកនាំសម្ព័ន្ធបក្សប្រឆាំងចំនួន ៣ ឆ្ពោះទៅរកជោគជ័យក្នុងការបោះឆ្នោតកាលពីឆ្នាំ២០១៣កន្លងមក។
លោក អាន់វ៉ា ត្រូវបានកាត់ទោសឲ្យជាប់ពន្ធនាគារ ក្រោមការចោទថាបានរួមភេទជាមួយអតីតជំនួយការរបស់ខ្លួនដែលជាបុរសដូចគ្នា។ ការចោទប្រកាន់នេះ ត្រូវបានលោក អាន់វ៉ា និងអ្នកគាំទ្រលោក ចាត់ទុកជាចេតនានយោបាយ ដើម្បីបញ្ចប់អាជីពនយោបាយរបស់លោក។
ប្រភពពីរដ្ឋាភិបាលម៉ាឡេស៊ី បានឲ្យដឹងថា ការបោះឆ្នោតជាតិ អាចត្រូវបានរៀបចំធ្វើឡើងនៅឆ្នាំនេះ ក្នុងបំណងរារាំងបក្សប្រឆាំងកុំឲ្យទទួលបានការគាំទ្រ។ ប៉ុន្តែ ការបោះឆ្នោតជាតិ ត្រូវបានកំណត់ធ្វើឡើងនៅពាក់កណ្ដាលឆ្នាំក្រោយ។
លោក អាន់វ៉ា បានទទួលការគាំទ្រពីអតីតនាយករដ្ឋមន្ត្រីម៉ាឡេស៊ី លោក មហាធៀ មហាម៉េធ ខណៈដែលក្រុមចាកចេញពីបក្សកាន់អំណាច និងបក្សប្រឆាំង បានរួមដៃគ្នាប្រឆាំងនឹងលោក ណាជីប ដែលឡោមព័ទ្ធទៅដោយរឿងអាស្រូវពុករលួយ៕