បណ្ដាក្រុមហ៊ុនជប៉ុន បានឲ្យដឹងថា តម្រូវការក្នុងស្រុកកំពុងដាំក្បាលចុះ គឺជាក្ដីបារម្ភធំបំផុតសម្រាប់ពួគេនៅក្នុងរយៈពេល ៣ឆ្នាំខាងមុខ ខណៈដែលកង្វះខាតកម្លាំងពលកម្ម គឺជាក្ដីកង្វល់បន្ទាប់។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters ដោយផ្អែកទៅតាមការស្ទង់មតិមួយ។
Reuters បានផ្សាយបន្តថា បណ្ដាក្រុមហ៊ុនជប៉ុនបានគូសបញ្ជាក់ពីបញ្ហាលំបាកក្នុងការសម្របខ្លួនទៅនឹងកំណើនចំនួនប្រជាជនវ័យចំណាស់ដ៏ឆាប់រហ័ស នៅក្នុងប្រទេសមួយនេះ។
បញ្ហាប្រឈមផ្នែកប្រជាសាស្ត្ររបស់ជប៉ុន បានលងបន្លាចក្រុមអ្នករៀបចំគោលនយោបាយជាតិអស់ប៉ុន្មានទសវត្សរ៍មកហើយ ក្នុងការព្យាយាមជំរុញស្ថិរភាពសេដ្ឋកិច្ច ខណៈដែលពលរដ្ឋជប៉ុន ដែលខ្វះទំនុកចិត្តលើអនាគតនោះ បានកាត់បន្ថយការចំណាយ ហើយងាកទៅសន្សំសំចៃច្រើនជាងចំណាយ។
ការស្ទង់មតិមួយ បានសាកសួរទៅបណ្ដាក្រុមហ៊ុនជប៉ុនថា តើអ្វីជាក្ដីកង្វល់ធំបំផុតរបស់ពួកគេ នៅក្នុងរយៈពេល ៣ឆ្នាំខាងមុខ។ ជាលទ្ធផល អ្នកគ្រប់គ្រងពាណិជ្ជកម្ម ៤០ភាគរយ បានឆ្លើយថា ការដាំក្បាលចុះនៃទីផ្សារ គឺជាកង្វល់ធំបំផុតរបស់ពួកគេ៕
