កូរ៉េខាងជើងនៅថ្ងៃព្រហស្បតិ៍នេះ បានហៅប្រធានាធិបតីអាមេរិក លោក ដូណល ត្រាំ ថាជាមនុស្សរោគចិត្ត ដែលមានភាពតឹងអារម្មណ៍ខ្លាំង ក្រោយពេលនិស្សិតស៊ើបការណ៍ Otto Warmbier ដែលកូរ៉េខាងជើងដោះលែងកាលពីសប្តាហ៍មុនបានស្លាប់។
កាសែតរបស់រដ្ឋកូរ៉េខាងជើង Rodong Sinmun បានចុះផ្សាយថា ប្រធានាធិបតីអាមេរិក កំពុងជួបការលំបាកខ្លាំងនៅក្នុងប្រទេស។ នេះបើតាមទីភ្នាក់ងារព័ត៌មានAFP។
កាសែតនោះបន្តទៀតថា កូរ៉េខាងត្បូងចាំបាច់ត្រូវតែដើរតាមគំនិតវិកលចរិតរបស់លោក ត្រាំ ហើយពេលនោះ នឹងធ្វើដំណើរឆ្ពោះទៅរកភាពមហន្តរាយ។
ការបាញ់សាកល្បងអាវុធនុយក្លេអ៊ែ និង មីស៊ីល តាំងពីឆ្នាំមុនមក បានធ្វើឲ្យមានភាពតានតឹងខ្លាំងនោះឧបទ្វីបកូរ៉េ ចំណែកករណីស្លាប់និស្សិតអាមេរិកក្រោយពេល កូរ៉េខាងជើងចាប់ខ្លួននោះ កាត់តែធ្វើឲ្យរដ្ឋអំណាចទីក្រុងព្យុងយ៉ាង និង ទីក្រុងវ៉ាស៊ីនតោនកាន់តែប្រឈមមុខដាក់គ្នាខ្លាំង។
លោកត្រាំ បានហៅកូរ៉េខាងជើងថា ជារបបឃោរឃៅ ហើយលោកថា នឹងមិនអត់ឱនឲ្យរបបកូរ៉េខាងជើងដែលមិនមានច្បាប់ទម្លាប់ និង គ្មានគោលការគោរពមនុស្សនោះទេ។
ភាសារបស់លោកត្រាំ ត្រូវបានជួយបន្ទរបន្ថែមពីប្រធានាធិបតីរបស់កូរ៉េខាងត្បូង លោក Moon Jae-In ដែលថ្លែងនៅក្នុងបទសម្ភាសន៍មួយតាមទូរទស្សន៍CBSថា ដំណើរការឆ្ពោះទៅមុខជានិច្ចគឺលោក ត្រាំ នឹងបំពេញទស្សនកិច្ចនៅកូរ៉េខាងត្បូងនៅសប្តាហ៍ក្រោយគឺជាការរៀបចំឆ្លើយតបករណីនិស្សិតម្នាក់បានស្លាប់។
និស្សិតជនជាតិអាមេរិក Otto Warmbier បានធ្វើដំណើរទៅកូរ៉េខាងជើង ហើយត្រូវបានកូរ៉េខាងជើងចាប់ខ្លួនពីបទចារកម្ម ហើយក្រោយមកក៏ត្រូវដោះលែងហើយយុវជននោះក៏បានស្លាប់។ សហរដ្ឋអាមេរិកបានថ្កោលទោសដល់រដ្ឋអំណាចទីក្រុងព្យុងយ៉ាងថា បានធ្វើទារុណកម្មធ្ងន់ធ្ងររហូតដល់និស្សិតរូបនោះ មានបញ្ហាស្មារតី ហើយបណ្តាលឲ្យស្លាប់៕