រញ្ជួយដីកម្រិត ៥.២រ៉ិចទ័រ បានវាយប្រហារភាគកណ្ដាលប្រទេសជប៉ុនទាំងព្រឹកព្រលឹមថ្ងៃអាទិត្យនេះ ប៉ុន្តែ គ្មានសញ្ញាព្រមានអំពីរលកយក្សស៊ូណាមិនោះឡើយ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីអាជ្ញាធរជប៉ុន និងអាមេរិក។
ទីភ្នាក់ងារស្ទង់ភូមិសាស្ត្រអាមេរិក បាននិយាយថា រញ្ជួយដីនោះ កើតឡើងនៅជម្រៅ ១០គីឡូម៉ែត្រក្នុងស្រទាប់ផែនដី និងប្រហែល ៣០គីឡូម៉ែត្រ ភាគខាងលិចនៃខេត្តណាហ្កាណូ នៅម៉ោងប្រហែល ៧ព្រឹក ឬត្រូវនឹងម៉ោងប្រហែល ៨ព្រឹក ម៉ោងនៅកម្ពុជា។
ភ្លាមៗនេះ គ្មានទេសេចក្ដីរាយការណ៍អំពីគ្រោះថ្នាក់ ឬការខូចខាតកើតចេញពីរញ្ជួយដីនេះ ហើយទីភ្នាក់ងារឧតុនិយមជប៉ុន ពុំបានចេញសញ្ញាព្រមានអំពីរលកយក្សស៊ូណាមិនោះឡើយ។
ប្រទសជប៉ុនស្ថិតនៅត្រង់ចំណុចប្រសព្វនៃស្រទាប់ទិចតូនិចចំនួន ៤ស្រទាប់ ហើយតែងតែទទួលរងរញ្ជួយដីជារៀងរាល់ឆ្នាំ។
រញ្ជួយដីដ៏ខ្លាំងក្លាបំផុតដែលបានវាយប្រហារប្រទេសនេះ កើតឡើងកាលពីខែមីនាឆ្នាំ២០១១ ដោយបានបង្កជារលកយក្សស៊ូណាមិ វាយប្រហារឆ្នេរភាគឦសានប្រទេសជប៉ុន និងសម្លាប់មនុស្សជាង ១ម៉ឺន ៨ពាន់នាក់ ព្រមទាំងបង្កឲ្យមានមហន្តរាយកើតចេញពីរោងចក្រនុយក្លេអ៊ែរទៀតផង៕