នគរបាលឥណ្ឌូនេស៊ីម្នាក់រងការវាយប្រហារដោយកាំបិតនៅពេលកំពុងបំពេញភារកិច្ចបន្ទាប់មកទៀត បានស្លាប់ដោយសាររបួសនោះ ចំណែកជនបង្កដែលគេសង្ស័យថាជាពួកក្រុមឧទ្ទាមត្រូវបានបាញ់សម្លាប់ក្រោយកើតហេតុនោះ។
នគរបាលថា ជនសង្ស័យម្នាក់ត្រូវបានបាញ់សម្លាប់ និង ម្នាក់ទៀត ត្រូវបានឃាត់ខ្លួននៅក្នុងក្រុងភាគខាងជើងនៃខេត្តស៊ូម៉ាត្រា។នេះបើតាមទីភ្នាក់ងារព័ត៌មានរ៉យទ័រ។
នគរបាលបញ្ជាក់ថា ហេតុការណ៍វាយប្រហារនគរបាលនៅប៉ុស្តិ៍យាមក្បែរ ស្នងការដ្ឋាននោះ បុរសអ្នកវាយប្រហារបានស្រែកពាក្យថា “Allahu Akbar” ឬ ព្រះជាម្ចាស់ដ៏អស្ចារ្យ មុនពេលគេចាប់ផ្តើមធ្វើសកម្មភាព។
ការវាយប្រហារដោយពួកជ្រុលនិយមកំពុងក្លាយជាការព្រួយបារម្ភខ្លាំងមួយរបស់ឥណ្ឌូនេស៊ី ស្របពេលកំពុងមានចលនាច្រើនពីពួកIS ហើយប្រទេសនេះជាប្រទេសកាន់សាសនឥស្លាមធំជាងគេបំផុតលើពិភពលោក។
ចលនាពួករដ្ឋឥស្លាមបានកើតឡើងកាន់តែខ្លាំងនៅប៉ុន្មានឆ្នាំចុងក្រោយនេះ នៅក្នុងប្រទេសឥណ្ឌូនេស៊ី ខណៈប្រទេសជិតខាងខ្លួនគឺនៅសិង្ហបុរី ម៉ាឡេស៊ី និង ហ្វីឡីពីនកំពុងរងការគំរាមកំហែងខ្លាំងដូចគ្នានេះដែរ។