បណ្ដាមន្ទីរពេទ្យនានាក្នុងប្រទេសប៉ាគីស្ថាន កាលពីថ្ងៃម្សិលមិញនេះ បានពុះពារព្យាបាលជនរងគ្រោះជាច្រើននាក់ ដែលបណ្ដាលពីការបំផ្ទុះគ្រាប់បែកនៅលើរថយន្តដឹកប្រេងមួយ ដែលបានសម្លាប់មនុស្សយ៉ាងតិច ១៤៦នាក់ ខណៈដែលនាយករដ្ឋមន្ត្រី លោក ណាវ៉ាស់ ហ្សារីហ្វ បានធ្វើដំណើរត្រឡប់ពីដំណើរទស្សនកិច្ចនៅក្រៅប្រទេសវិញ ដើម្បីទៅសួរសុខទុក្ខជនរងគ្រោះ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
មន្ត្រីរដ្ឋាភិបាល និងអ្នកជួយសង្គ្រោះ បាននិយាយថា មនុស្សដល់ទៅជាង ១១៨នាក់ បានរងរបួសនៅក្នុងហេតុការណ៍បំផ្ទុះគ្រាប់បែកនៅភាគខាងកើតនៃខេត្តបញ្ចាប ដែលការវាយប្រហារនោះ កើតឡើងចំពេលដែលមនុស្សប្រមូលផ្ដុំគ្នាដើម្បីប្រមូលប្រេងលេចធ្លាយ ក្រោយពីឡានដឹកប្រេងមួយគ្រឿងបានក្រឡាប់កាលពីថ្ងៃអាទិត្យចុងសប្ដាហ៍កន្លងមកនេះ។
វាជាអំពើហឹង្សាដ៏បង្ហូរឈាមមួយដែលបានកើតឡើងនៅចំថ្ងៃដែលសាសនិកមូស្លីមប្រារព្ធពិធីបុណ្យស្រាយបួស នៅចុងរដូវបុណ្យរ៉ាំម៉ាឌន។ យ៉ាងហោចណាស់មនុស្ស ៦៥នាក់ ត្រូវបានសម្លាប់នៅក្នុងអំពើហឹង្សាបំផ្ទុះគ្រាប់បែក នៅក្នុងទីក្រុងចំនួន ២ កាលពីថ្ងៃសុក្រសប្ដាហ៍មុន ដែលពួកបះបោរឥស្លាមជ្រុលនិយម បានប្រកាសទទួលខុសត្រូវ។
មន្ទីរពេទ្យនានាកំពុងតែរៀបចំតេស្ដ DNA ដើម្បីស្វែងរកអត្តសញ្ញាណសព ដែលត្រូវភ្លើងឆាបឆេះរលាកខ្លួនរហូតដល់មើលមិនយល់។ យ៉ាងហោចណាស់កុមារ ២០នាក់ ក៏ស្ថិតក្នុងចំណោមអ្នកស្លាប់ទាំងនោះផងដែរ៕