ជយលាភីពានរង្វាន់ណូបែលសន្តិភាពរបស់ចិន លោក លីវ ស៊ាវប៉ូ ត្រូវបានគេផ្ទេរពីពន្ធនាគារទៅមន្ទីរពេទ្យមួយដើម្បីព្យាបាលជំងឺមហារីកដំណាក់កាលចុងក្រោយ ប៉ុន្តែ អ្នកគាំទ្ររូបលោកបានអំពាវនាវឲ្យដោះលែងរូបលោកដោយគ្មានលក្ខខណ្ឌ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីមេធាវីរបស់លោក លីវ ស៊ាវប៉ូ។
មេធាវីលោក ម៉ូ សៅពីង បានឲ្យដឹងថា លោក លីវ ដែលកំពុងជាប់ឃុំអស់រយៈពេល ៣ឆ្នាំហើយក្នុងចំណោមទោសរយៈពេល ១១ឆ្នាំនោះ ត្រូវបានគេរកឃើញថាមានជំងឺមហារីកថ្លើមដំណាក់កាលចុងក្រោយនៅថ្ងៃទី២៣ ខែឧសភា និងត្រូវបានអនុញ្ញាតឲ្យចេញទៅព្យាបាល។
សកម្មជនគាំទ្រលទ្ធិប្រជាធិបតេយ្យវ័យ ៦១ឆ្នាំរូបនេះ ត្រូវបានគេនាំទៅព្យាបាលនៅមន្ទីរពេទ្យមួយនៅភាគឦសាននៃទីក្រុងស៊ិនយ៉ាង ក្នុងខេត្តឡៅនីង ជាកន្លែងដែលគេឃុំខ្លួនរូបលោក។
ការិយាល័យរដ្ឋបាលពន្ធនាគារឡៅនីង បានបញ្ជាក់ពីការបញ្ជូនលោក លីវ ទៅព្យាបាលនៅខាងក្រៅ ដោយថា លោក លីវ ស្ថិតក្រោមការព្យាបាលពីគ្រូពេទ្យចិនចំនួន ៨រូប នៅឯមន្ទីរពេទ្យនៃសាកលវិទ្យាល័យវេជ្ជសាស្ត្រចិន៕
កវីនិពន្ធរូបនេះ ត្រូវបានអាជ្ញាធរចិនកាត់ទោសកាលពីឆ្នាំ២០០៩ ក្រោយជំរុញឲ្យមានកំណែទម្រង់ប្រជាធិបតេយ្យ។ លោក លីវ ត្រូវបានជ្រើសរើសជាជយលាភីពានរង្វាន់ណូបែល ខណៈលោកកំពុងជាប់ឃុំក្នុងពន្ធនាគារ៕
