រដ្ឋាភិបាលហ្វីលីពីន បានចេញមកអះអាងថា ប្រធានាធិបតីលោក រ៉ូទ្រីហ្កូ ឌូទើតេ មានសុខភាពល្អធម្មតា និងមិនមានបញ្ហាសុខភាពនោះឡើយ ចំពេលដែលមានក្ដីបារម្ភអំពីអវត្តមានដ៏ចម្លែករបស់លោកពីភ្នែកសាធារណជនអស់រយៈពេលយ៉ាងនៅក្នុងខែនេះ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
ដោយត្រូវគេដឹងថាមានភាពមមាញឹកខ្លាំង និងតែងតែថ្លែងសុន្ទរកថាវែងៗជាច្រើនលើកក្នុងមួយថ្ងៃៗនោះ អវត្តមានរបស់មេដឹកនាំវ័យ ៧១ឆ្នាំរូបនេះ បានបញ្ឆេះឲ្យមានពាក្យចរចាមអារ៉ាមថា លោកកំពុងមានបញ្ហាសុខភាពចុះទន់ខ្សោយ ហើយរដ្ឋាភិបាលកំពុងព្យាយាមលាក់បាំងបញ្ហានេះ។ លោក ឌូទើតេ បានបង្ហាញខ្លួនជាសាធារណៈកាលពីមួយសប្ដាហ៍មុន។
អ្វីដែលធ្វើអវត្តមានរបស់លោកក្លាយទៅជារឿងធំនោះ គឺដោយសារតែវ័យចំណាស់របស់អំឡុងពេលកាន់តំណែងជាប្រធានាធិបតី ខណៈដែលកងទ័ពកំពុងតែប្រយុទ្ធតទល់នឹងពួកបះបោរឥស្លាមជ្រុលនិយមអស់រយៈពេល ៦សប្ដាហ៍មកហើយ។ ពួកបះបោរឥស្លាមជ្រុលនិយម សព្វថ្ងៃនេះ កំពុងកាន់កាប់ផ្នែកខ្លះនៃទីក្រុងម៉ារ៉ាវី ស្ថិតនៅលើកោះមិនដាណាវ នៅភាគខាងត្បូងប្រទេសហ្វីលីពីន។
អ្នកនាំពាក្យប្រធានាធិបតីហ្វីលីពីន លោក អ៊ែណេស្តូ អាបេឡា បានប្រាប់អ្នកសារព័ត៌មានថា លោក ឌូទើតេ មានសុខភាពល្អ គ្រាន់តែលោកជាប់រវល់ធ្វើអ្វីដែលគាត់ចាំបាច់ធ្វើតែប៉ុណ្ណោះ៕