អភិបាលក្រុងហុងកុងចុងក្រោយគេរបស់អង់គ្លេស បាននិយាយថា ពិភពលោកកំពុងតែសម្លឹងមើលទីក្រុងហុងកុង ចាត់ទុកជាការសាកល្បងមួយថា តើចិននឹងរក្សាសម្ដីរបស់ខ្លួន ឬយ៉ាងណា។ នេះដោយយោងតាមកការផ្សាយរបស់ទីភ្នាក់ងារព័ត៌មាន AFP។
AFP បានបន្តថា អតីតអភិបាលក្រុងហុងកុង លោក Chris Patten បានលើកឡើងដូច្នេះ នៅមុនការប្រារព្ធខួប ២០ឆ្នាំ នៃការផ្ទេរទឹកដីហុងកុងពីរដ្ឋបាលអង់គ្លេស ទៅឲ្យប្រទេសចិនវិញ។
ប្រធានាធិបតីចិន លោក ស៊ី ជិនពីង នឹងធ្វើដំណើរទៅទីក្រុងហុងកុង ដើម្បីរំលឹកខួបនៃការផ្ទេរទឹកដីក្រុងហុងកុងថ្ងៃទី០១ ខែកក្កដា ហើយលោក Chris Patten និយាយថា លោក ស៊ី គួរតែបញ្ជាក់ឡើងវិញពីជំហររបស់រដ្ឋាភិបាលក្រុងប៉េកាំង ក្នុងការគោរពទៅតាមកិច្ចសន្យាស្វយ័តភាពមួយហៅថា “ប្រទេសមួយ ប្រព័ន្ធពីរ”។
លោក Chris Patten កត់សម្គាល់ថា ថ្មីៗនេះ ក្រុងប៉េកាំងកាន់តែរឹតកណ្ដាប់ដៃរបស់ខ្លួនទៅលើទីក្រុងហុងកុង។
នៅមុនដំណើរទស្សនកិច្ចរបស់លោក ស៊ី ទីក្រុងហុងកុងបានពើបប្រទះនឹងការតវ៉ាជាច្រើនពីសំណាក់សកម្មជនគាំទ្រលទ្ធិប្រជាធិបតេយ្យ ខណៈដែលពួកគេព្រួយបារម្ភថា ក្រុងប៉េកាំងកាន់តែរំលោភលើកិច្ចព្រមព្រៀង ដោយលូកដៃចូលកិច្ចការនយោបាយ ប្រព័ន្ធតុលាការ វិស័យអប់រំ និងប្រព័ន្ធផ្សព្វផ្សាយ៕
