មន្ត្រីជាន់ខ្ពស់ទទួលបន្ទុកផ្នែកសិទ្ធិមនុស្សរបស់អង្គការសហប្រជាជាតិ បានរិះគន់នាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ ចំពោះសុន្ទរកថាអំឡុងពេលយុទ្ធនាការឃោសនាបោះឆ្នោត ដែលអ្នកស្រីលើកឡើងថា ច្បាប់អាចនឹងក្រឡាប់ចាក់ ប្រសិនបើច្បាប់ទាំងនោះរាំងខ្ទប់ការប្រយុទ្ធប្រឆាំងនឹងចលនាភេរវកម្ម។
ប្រធានឧត្ដមស្នងការសិទ្ធិមនុស្សអង្គការសហប្រជាជាតិ លោក ហ្ស៊ីដ រ៉ាអាដ អាល់ហ៊ូសេន បានថ្លែងនៅទីក្រុងឡុងដ៍នៅថ្ងៃនេះថា មិនអ្វីជាចេតនាស្ថិតនៅពីក្រោយសុន្ទរកថារបស់អ្នកស្រីទេ សម្ដីរបស់អ្នកស្រីពិតជាគួរឲ្យសោកស្ដាយណាស់។ លោកបានចាត់ទុកសម្ដីអ្នកស្រី ម៉េយ៍ ជាអំណោយមួយពីមេដឹកនាំលោកខាងលិចដ៏ធំមួយ សម្រាប់មេដឹកនាំផ្ដាច់ការនៅជុំវិញពិភពលោក ដែលបានរំលោភបំពានសិទ្ធិមនុស្សដោយឥតអៀនខ្មាស់ នៅក្រោមស្លាកប្រយុទ្ធប្រឆាំងនឹងអំពើភេរវកម្ម។
លោក ហ្ស៊ីដ ក៏បានថ្លែងផងថា ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ សុទ្ធតែកំពុងរំលោភសិទ្ធិមនុស្ស ដោយបានគាំទ្រអំពើទារុណកម្ម និងការសម្លាប់មនុស្សក្រៅប្រព័ន្ធតុលាការ។
មន្ត្រីសិទ្ធិមនុស្សរូបនេះ បានកត់សម្គាល់ថា គ្រោះថ្នាក់ចំពោះប្រព័ន្ធច្បាប់អន្តរជាតិទាំងមូល កំពុងកើតឡើងយ៉ាងពិតប្រាកដ៕
