អ្នកភូមិនៅប្រទេសចិន បានធ្វើដំណើរទៅសួរសុខទុក្ខសាច់ញាតិរបស់ខ្លួនកាលពីថ្ងៃម្សិលមិញនេះ ដើម្បីកាន់ទុក្ខសាច់ញាតិរបស់ពួកគេដែលបាត់បង់ជីវិតនៅក្នុងគ្រោះថ្នាក់រអិបាលបាក់ដីពីភ្នំ ដោយក្ដីសង្ឃឹមតិចតួចប៉ុណ្ណោះថា ពួកគេអាចរកឃើញសាច់ញាតិរបស់ពួកគេ ក្រោយពីការស្វែងរកអស់រយៈពេលជាង ២ថ្ងៃមកហើយនោះ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
យ៉ាងហោចណាស់មនុស្ស ៩៣នាក់ កំពុងបាត់ខ្លួន បន្ទាប់ពីដីភ្នំបានរអិលបាក់ធ្លាក់សង្កត់លើភូមិស៊ីនម៉ូ នៅតំបន់ភ្នំ ក្នុងខេត្តស៊ីឈួន កាលពីព្រឹកថ្ងៃសៅរ៍សប្ដាហ៍មុន។ មនុស្ស ១០នាក់ ត្រូវបានគេបញ្ជាក់ថា ស្លាប់។
រដ្ឋាភិបាលចិនបានបញ្ជូនក្រុមអ្នកជួយសង្គ្រោះប្រហែល ៣០០នាក់ ទៅទីនោះ រួមទាំងគ្រឿងចក្រធុនធ្ងន់សម្រាប់គាស់កាយដី និងបានសន្យាធ្វើអ្វីគ្រប់យ៉ាងតាមតែអាចធ្វើទៅបាន ដើម្បីស្វែងរកអ្នកនៅរស់រានមានជីវិត។
អាជ្ញាធរចិននិយាយថា ភ្លៀងធ្លាក់ជោគជាំបានបង្កឲ្យរអិលបាក់ដីពីភ្នំ៕
