នាយករដ្ឋមន្ត្រីសិង្ហបុរីលោក Lee Hsien Loong លើកឡើងកាលពីថ្ងៃអង្គារម្សិលមិញថា រាល់ការចោទប្រកាន់ពីបងប្អូនបង្កើតលើរូបលោកនោះ ភាគច្រើនលើសលប់គឺមិនមានភាពត្រឹមត្រូវនោះទេ។
ជាការឆ្លើយតបទៅនឹងការផ្សព្វផ្សាយលើហ្វេសប៊ុករបស់ប្អូនប្រុស និង ប្អូនស្រី គឺលោក Lee ថ្លែងថា រាល់ការបន្តចោទប្រកាន់ពីអ្វីដែលបានធ្វើ និង អ្វីដែលលោកមិនបានធ្វើនោះកន្លងមកនោះគឺភាគច្រើនជា រឿងមិនពិត។ លោកថ្លែងថា នៅពេលឆាប់ៗខាងមុខនេះលោកនឹងធ្វើសេចក្តីថ្លែងការណ៍មួយ នៅក្នុងសភានៅថ្ងៃទី៣ខែកក្កដា ឆ្នាំ២០១៧ ដើម្បីបកស្រាយរាល់បញ្ហាទាំងអស់នោះ។
លោក Lee ប្អូនប្រុសលោកឈ្មោះ Lee Hsien Yang និង ប្អូនស្រីឈ្មោះ Lee Wei Ling បានផ្ទុះឡើងជម្លោះជាសាធារណៈលើបញ្ហាផ្ទះមួយកន្លែងនៅ38 Oxley Road ដែលបន្សល់ទុកពីឪពុករបស់ពួកគេលោក Lee Kuan Yew។
ក្រោយពេលជម្លោះក្នុងគ្រួសារផ្ទុះឡើង លោក Lee Hsien Loong ក៏បានចេញមុខសុំទោសប្រជាពលរដ្ឋជាសាធារណៈ ដែលថា ជម្លោះក្នុងគ្រួសារថ្នាក់ដឹកនាំនេះ ធ្វើឲ្យប៉ះពាល់ដល់កិត្តិយសរបស់ប្រជាពលរដ្ឋ និង ជាតិសាសន៍ទាំងមូល៕