ការសិក្សារបស់ក្រុមអ្នកជំនាញមួយបានឲ្យដឹងថា ប្រទេសចិនគឺជាប្រទេសប្រឈមមុខអ្នកមានជំងឺទឹកនោមផ្អែមច្រើនជាងគេលើពិភពលោក គឺមានប្រមាណ១១ភាគរយនៃប្រជាពលរដ្ឋកំពុងមានជំងឺ និង ប្រមាណ៣៦ភាគរយផ្សេងទៀតប្រឈមមុខកើតជំងឺនេះ។
នេះបើតាមការចុះផ្សាយរបស់ទស្សនាវដ្តីសមាគមវេជ្ជសាស្រ្តរបស់អាមេរិក ដែលបានចុះផ្សាយកាលពីថ្ងៃទី២៧ខែមិថុនាម្សិលមិញ។
ក្នុងការសិក្សាស្រាវជ្រាវគេបានសិក្សាលើមនុស្ស១៧០ ២៨៧នាក់ ដែលបានចាប់ផ្តើមកាលពីឆ្នាំ២០១៣ ហើយត្រូវបានចូលរួមវិភាគលើលទ្ធផលដោយវេជ្ជបណ្ឌិតមកពីមជ្ឈមណ្ឌលត្រួតពិនិត្យ និង បង្ការជំងឺទឹកនោមផ្អែករបស់ចិនផងដែរ។ នេះបើតាមទភ្នាក់ងារព័ត៌មានរ៉យទ័រ។
ក្រុមអ្នកស្រាវជ្រាវបានវាស់វែងកម្រិតជាតិស្ករដែលមាននៅក្នុងឈាម។ ការសិក្សាបញ្ជាក់ថា បើសិនជាកម្រិតជាស្ករ១២៦ មីលីក្រាម ក្នុង១ដេស៊ីលីត ឈាម ឬ ច្រើនជាងនេះនោះ គេអាចបញ្ជាក់បានថា អ្នកនោះនឹងកើតមានជំងឺទឹកនោមផ្អែម ហើយបើសិនជាស្ថិតក្នុងកម្រិតចន្លោះ១០៥ទៅ១២៦ នោះត្រូវបានកំណត់ថា ប្រឈមនឹងជំងឺទឹកនោមផ្អែម៕