កងទ័ពហ្វីលីពីនលើកឡើងថា ជនស៊ីវិលដែលត្រូវបានចាប់ធ្វើជាចំណាត់ខ្មាំងនៅភាគខាងត្បូង ត្រូវបានពួកក្រុមឧទ្ទាមបង្ខំឲ្យធ្វើជាទាសករផ្លូវភេទរបស់ពួកក្រុមប្រយុទ្ធនេះ នាំឲ្យមានការថ្កោលទោសខ្លាំងពីក្រុមអ្នកការពារសិទ្ធិមនុស្ស។
តាមអ្នកភូមិចំនួន៧នាក់ដែលរត់គេចចេញពីកន្លែងវាយលុករបស់ពួកISនៅទីក្រុងម៉ារ៉ាវី ហើយត្រូវបានជួយសង្គ្រោះបានថ្លែងថា ចំណាត់ខ្មាំងមួយចំនួនត្រូវបង្ខំឲ្យកាន់សាសនាឥស្លាម វាយបង្ខំឲ្យចូលព្រះវិហារ និង រៀបការជាមួយក្រុម Moute ជាក្រុមបះបោរបណ្តាញពួកIS។ នេះបើតាមទីភ្នាក់ងារព័ត៌មានរ៉យទ័រ។
អ្នកនាំពាក្យយោធាហ្វីលីពីនលោក Jo-Ar Herrera ថ្លែងថា ទាំងនេះគឺជាអ្វីដែលកំពុងកើតមានលើជនរងគ្រោះដែលត្រូវចាប់ធ្វើចំណាត់ខ្មាំង ដែលលោកថា នោះជាសារធាតុអាក្រក់ពីកំណើតរបស់ពួកក្រុមឧទ្ទាម ហើយបានបំពានធ្ងន់ធ្ងរដល់កិត្តិយស និង សេចក្តីថ្លៃថ្នូររបស់ស្ត្រី។
ប្រធានាធិបតីហ្វីលីពីនដែលបាត់មុខ ប៉ុន្មានសប្តាហ៍កន្លងទៅនេះ បានថ្លែងថា លោកមានការសោកស្តាយ និង ក្រៀមក្រំចំពោះ ហេតុការកើតឡើងនៅភាគខាងត្បូង ហើយសន្យាថា នឹងរៀបចំទីក្រុងនោះឲ្យបានប្រសើរឡើងវិញ៕
