ប្រទេសចិនបានជំរុញទៅអាមេរិកឲ្យទម្លាក់ចោលភ្លាមៗនូវ “ការសម្រេចចិត្តខុសឆ្គង”របស់ខ្លួន ដែលបានសម្រេចលក់អាវុធទៅឲ្យកោះតៃវ៉ាន់ក្នុងតម្លៃ ១.៤២ពាន់លានដុល្លារ ដោយចាត់ទុកបញ្ហានេះជាការអនុវត្តផ្ទុយទៅនឹងការមូលមតិមួយ ដែលប្រធានាធិបតីចិន លោក ស៊ី ជិនពីង និងប្រធានាធិបតីអាមេរិក លោក ដូណាល់ ត្រាំ បានឯកភាពនៅក្នុងជំនួបមួយកាលពីខែមេសា នៅរដ្ឋផ្លរីដា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ស្ថានទូតចិននៅទីក្រុងវ៉ាស៊ីងតោន បាននិយាយក្នុងសេចក្ដីប្រកាសព័ត៌មានមួយថា ការព្រមព្រៀងលក់អាវុធទៅឲ្យកោះតៃវ៉ាន់នេះ បានបញ្ជូនសារមិនត្រឹមត្រូវមួយសម្រាប់កម្លាំង “ឯករាជ្យកោះតៃវ៉ាន់”។
អ្នកនាំពាក្យក្រសួងការបរទេសអាមេរិក បាននិយាយកាលពីថ្ងៃព្រហស្បតិ៍កន្លងមកថា រដ្ឋបាលលោក ដូណាល់ ត្រាំ បានប្រាប់ទៅសភាអាមេរិកអំពីសំណើលក់អាវុធចំនួន ៧ ទៅឲ្យកោះតៃវ៉ាន់។
ប៉ុន្តែ ស្ថានទូតចិន បាននិយាយថា រដ្ឋាភិបាល និងប្រជាជនចិន មានសិទ្ធិគ្រប់គ្រាន់នឹងផ្ទុះកំហឹងចំពោះបញ្ហានេះ។
ចិនបានចាត់ទុកកោះតៃវ៉ាន់ជាអាណាខេត្តរបស់ខ្លួន និងមិនដែលបោះបង់ចោលការប្រើប្រាស់កម្លាំងដើម្បីយកដែនដីនេះមកដាក់ក្រោមការគ្រប់គ្រងរបស់ខ្លួនវិញនោះទេ៕