ប្រទេសចិន បាននិយាយកាលពីថ្ងៃម្សិលមិញថា សេចក្ដីប្រកាសរួមជាមួយអង់គ្លេសដែលគូសវាសពីអនាគតរបស់ទីក្រុងហុងកុងក្រោយការប្រគល់ដែនដីនេះទៅឲ្យចិននៅឆ្នាំ១៩៩៧នោះ គ្រាន់តែជាឯកសារប្រវត្តិសាស្ត្រ ដែលមិនមានសារៈសំខាន់ក្នុងការអនុវត្តតទៀតនោះឡើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានចុះផ្សាយដូច្នេះ ដោយបានដកស្រង់សេចក្ដីប្រកាសព័ត៌មានមួយរបស់ក្រសួងការបរទេសចិន បន្ទាប់ពីមានការចោទសួរយ៉ាងច្រើនអំពីជំហររបស់ចិនដែលបានសន្យាផ្ដល់សេរីភាពមូលដ្ឋានដល់ទីក្រុងហុងកុង ចំពេលដែលប្រធានាធិបតីចិន លោក ស៊ី ជិនពីង កំពុងបំពេញទស្សនកិច្ចនៅទីក្រុងមួយនេះ។ ដែនដីទីក្រុងហុងកុង ត្រូវបានអង់គ្លេសប្រគល់ទៅឲ្យចិនវិញនៅឆ្នាំ១៩៩៧ ក្រោមកិច្ចព្រមព្រៀង “ប្រទេសមួយ ប្រព័ន្ធពីរ”។
ប្រទេសចិនបានប្រកាសបែបនេះ មួយថ្ងៃក្រោយពីអង់គ្លេសបានបញ្ជាក់ជំហររបស់ខ្លួនជាថ្មីក្នុងការគោរពតាមឯកសារនោះ។ ទីក្រុងហុងកុងត្រូវរៀបចំប្រារព្ធខួប ២០ឆ្នាំនៃការផ្ទេរដែនដីមួយនេះ នៅថ្ងៃទី០១ ខែកក្កដានេះ៕