ប្រធានាធិបតីចិន លោក ស៊ី ជិនពីង បានស្ដាប់ការស្បថចូលកាន់តំណែងរបស់មេដឹកនាំថ្មីនៃទីក្រុងហុងកុងនៅថ្ងៃនេះ ដោយលោកព្រមានថា ក្រុងប៉េកាំងនឹងមិនលើកលែងចំពោះបញ្ហាប្រឈមណាមួយទៅនឹងអំណាចរបស់ខ្លួន។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
Reuters បានដកស្រង់សម្ដីមេដឹកនាំចិនបែបនេះ អំឡុងពេលលោកថ្លែងសុន្ទរកថានៅចំថ្ងៃប្រារព្ធខួប ២០ឆ្នាំ នៃការប្រគល់ដែនដីទីក្រុងហុងកុងពីអង់គ្លេសទៅចិនវិញ។
សន្តិសុខត្រូវបានគេរឹតបន្តឹងនៅតាមបណ្ដាវិថីនានានៅទីក្រុងកំពង់ផែមួយនេះ ជាទីដែលអភិបាលក្រុងហុងកុងចុងក្រោយគេ លោក Chris Patten បានប្រគល់ដែនដីនេះទៅឲ្យចិនវិញទាំងទឹកភ្នែក។
លោក ស៊ី ថ្លែងថា ការប៉ុនប៉ងណាមួយធ្វើឲ្យគ្រោះថ្នាក់ដល់អធិបតេយ្យភាព និងសន្តិសុខចិន ធ្វើឲ្យរដ្ឋាភិបាលកណ្ដាលជួបបញ្ហានោះ គឺជាទង្វើដែលរំលោភលើបន្ទាត់ក្រហម និងមិនអាចលើកលែងឲ្យបាន។
នៅក្រោមធម្មនុញ្ញរបស់ទីក្រុងហុងកុង មជ្ឈមណ្ឌលហិរញ្ញវត្ថុមួយនេះ ត្រូវបានធានានូវសេរីភាពសម្រាប់រយៈពេលយ៉ាងតិច ៥០ឆ្នាំ ក្រោយឆ្នាំ១៩៩៧។ ដែនដីហុងកុង ត្រូវបានចាត់ថ្នាក់ជាតំបន់រដ្ឋបាលពិសេស ដែលស្ថិតនៅក្រោមទម្រង់ “ប្រទេសមួយ ប្រព័ន្ធពីរ”៕