ប្រធានាធិបតីអាមេរិក លោក ដូណាល់ ត្រាំ បានប្រកាសថា អាមេរិកអស់ភាពអត់ធ្មត់នឹងកូរ៉េខាងជើងហើយ ជុំវិញការជំរុញកម្មវិធីអភិវឌ្ឍន៍នុយក្លេអ៊ែររបស់ប្រទេសនេះ កាលពីថ្ងៃម្សិលមិញនេះ ខណៈដែលស្វាគមន៍មេដឹកនាំថ្មីរបស់កូរ៉េខាងត្បូង លោក មូន ជែអ៊ីន ធ្វើដំណើរទៅជជែកគ្នានៅសេតវិមាន។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
បើតាម AFP ខណៈដែលលោក មូន កំពុងតែចាត់ទុកការភ្ជាប់ទំនាក់ទំនងក្រុងព្យុងយ៉ាងឲ្យទូលាយជាងមុន ជាមធ្យោបាយដ៏ល្អបំផុតសម្រាប់ញ្ឈប់កម្មវិធីនុយក្លេអ៊ែរ និងគ្រាប់មីស៊ីលរបស់កូរ៉េខាងជើងនោះ លោក ត្រាំ បានបញ្ជាក់ច្បាស់ៗថា លោកគ្មានអារម្មណ៍ដាក់សម្ពាធកាទូតជាមួយរបបដឹកនាំមួយ ដែលលោកចោទថា គ្មានការគោរពជីវិតមនុស្សនោះឡើយ។
ខណៈដែលលោក មូន បានប្រកាសថា លោក ត្រាំ ទទួលយកសំណើអញ្ចើញទៅទស្សនកិច្ចនៅទីក្រុងសេអ៊ូលនៅឆ្នាំនេះនោះ មេដឹកនាំទាំងពីរពុំបានគូសបញ្ជាក់ពីយុទ្ធសាស្ត្ររួមក្នុងការដោះស្រាយការគំរាមកំហែងបង្កឡើងដោយមេដឹកនាំកូរ៉េខាងជើងនោះឡើយ៕