ក្រុមឧទ្ទាមជ្រុលនិយមដែលបានកាន់ទីក្រុងនៅភាគខាងត្បូងហ្វីលីពីន បានបង្ខំឲ្យប្រជាជនជិត ៤សែននាក់ រត់គេចចេញពីផ្ទះសម្បែងរបស់ពួកគេ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដោយបានដកស្រង់សម្ដីមន្ត្រីរដ្ឋាភិបាលហ្វីលីពីន ដែលបានព្រមានអំពីការផ្ទុះឡើងនៃជំងឺ និងវិបត្តិផ្លូវចិត្តក្នុងចំណោមជនភៀសខ្លួន។
ទីក្រុងម៉ារ៉ាវី ដែលជាទីក្រុងមូស្លីមធំជាងគេនៅហ្វីលីពីន បានប្រែក្លាយទៅជាទីក្រុងខ្មោចដ៏ស្ងាត់ជ្រងំ បន្ទាប់ពីក្រុមបះបោរយកលំនាំតាមក្រុមភេរវកម្មរដ្ឋឥស្លាម បានបើកការវាយប្រហារទៅលើទីក្រុងនេះ កាលពីថ្ងៃទី២៣ ខែឧសភាកន្លងមកនេះ។
អស់រយៈពេលជាង ១ខែមកនេះ រដ្ឋាភិបាលបានដាក់ពង្រាយយន្តហោះចម្បាំង ឧទ្ធម្ភាគចក្រប្រយុទ្ធ និងរថពាសដែក ដើម្បីកម្ទេចពួកឧទ្ទាម ដែលជាសមាជិកនៃក្រុមម៉ូតេ។
ការប្រយុទ្ធគ្នានេះ បានបណ្ដាលឲ្យមនុស្សជាង ៤០០នាក់ស្លាប់ ខណៈដែលក្រុមសកម្មប្រយុទ្ធនៅតែគ្រប់គ្រងផ្នែកខ្លះនៃទីក្រុងនេះ ដោយប្រើប្រាស់កាំភ្លើងស៊ីប និងសព្វាវុធទំនើបៗ សម្រាប់ទប់ទល់នឹងការរុលទៅមុខរបស់កងទ័ពរដ្ឋាភិបាល។
នាយកការពារជនស៊ីវិលប្រចាំតំបន់ លោក Liza Mazo បាននិយាយថា នេះមិនត្រឹមតែពលរដ្ឋរស់នៅក្នុងទីក្រុងប៉ុណ្ណោះទេដែលចាកចេញ ប៉ុន្តែ ពលរដ្ឋដែលរស់នៅជុំវិញទីនោះ ក៏បានរត់គេចចេញផងដែរ៕
