ពលរដ្ឋកូរ៉េខាងជើង ៥នាក់ ដែលស្ថិតក្នុងទូកតូចមួយ បានធ្វើដំណើរកាត់ព្រំដែនសមុទ្រចូលទៅដែនទឹកកូរ៉េខាងត្បូងកាលពីថ្ងៃម្សិលមិញនេះ ដែលហាក់ដូចជាមានបំណងចុះចូលនឹងកូរ៉េខាងត្បូង។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីឆ្មាំសមុទ្រកូរ៉េខាងត្បូង។
ទីភ្នាក់ងារព័ត៌មានកូរ៉េខាងត្បូងយ៉ុនហាប់ បានរាយការណ៍ថា មនុស្សទាំង ៥នាក់នោះ ក្នុងនោះមានស្ត្រីម្នាក់ផងដែរ បានបង្ហាញបំណងរស់នៅក្នុងទឹកដីកូរ៉េខាងត្បូង ក្នុងនាមជាអ្នកចុះចូល។
ឆ្មាំសមុទ្រកូរ៉េខាងត្បូង បានប្រាប់ថា ពួកគេបាននាំទូកតូចនោះចូលដល់ច្រាំងដោយសុវត្ថិភាព ហើយអាជ្ញាធររដ្ឋាភិបាលកំពុងតែសាកសួរអ្នកទាំង ៥នាក់នោះ។
ហេតុការណ៍នេះ បានកើតឡើងបន្ទាប់ពីទូកនេសាទកូរ៉េខាងជើងមួយគ្រឿងផ្ទុកមនុស្ស ៨នាក់ ជួបប្រទះនឹងបញ្ហាម៉ាស៊ីន ហើយរសាត់អណ្ដែតចូលដែនទឹកកូរ៉េខាងត្បូង ស្ថិតនៅឆ្នេរភាគខាងកើតកាលពីចុងខែមិថុនានេះ៕