រដ្ឋាភិបាលយោធាថៃ បាននិយាយថា ខ្លួននឹងផ្អាកការអនុវត្តច្បាប់ការងារថ្មី បន្ទាប់ពីពលករបរទេសរាប់ពាន់នាក់ បានរត់គេចខ្លួន ឬវិលត្រឡប់ទៅប្រទេសកំណើតរបស់ពួកគេវិញនៅសប្ដាហ៍នេះ ដោយភ័យខ្លាចការចាប់ខ្លួន និងការដាក់ពិន័យធ្ងន់ធ្ងរនៅក្រោមច្បាប់ថ្មីនេះ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ការអនុវត្តច្បាប់ថ្មីនេះ បានបង្កឲ្យមានចលាចលជាថ្មី កើតចេញពីការប្រឹងប្រែងអនុវត្តច្បាប់គ្រប់គ្រងទៅលើពលករបរទេសរាប់លាននាក់ដែលកំពុងចូលរួមចំណែកជំរុញកម្លាំងសេដ្ឋកិច្ចថៃ តាមរយៈការបម្រើការងារក្នុងរោងចក្រ ឧស្សាហកម្មនេសាទ និងការងារផ្ដល់ប្រាក់ឈ្នួលទាបៗ។
រដ្ឋាភិបាលយោធាថៃបានដឹកនាំយុទ្ធនាការនេះ ក្នុងបំណងចុះបញ្ជីពលករបរទេស និងបង្ក្រាបលើបណ្ដាញជួញដូរពលករខុសច្បាប់ ប៉ុន្តែ កិច្ចខិតខំប្រឹងប្រែងរបស់រដ្ឋាភិបាលថៃ មានរយៈពេលតក់ក្រហល់ និងកើតឡើងរយៈពេលខ្លី។
ជាលទ្ធផល ពលករចំណាកស្រុកជាច្រើននៅតែគ្មានឯកសារ ហើយងាយធ្លាក់ទៅជាជនរងគ្រោះនៃការកេងប្រវ័ញ្ចមនុស្សពីសំណាក់ពួកថៅកែ។
កាលពីថ្ងៃសុក្រកន្លងមកនេះ រដ្ឋាភិបាលយោធាថៃនិយាយថា ខ្លួននឹងផ្អាកផ្នែកខ្លះនៃច្បាប់ថ្មីសម្រាប់គ្រប់គ្រងពលករបរទេស ដែលបានចូលជាធរមានកាលពីថ្ងៃទី២៣ ខែមិថុនា សម្រាប់រយៈពេល ១២០ថ្ងៃ បន្ទាប់ពីច្បាប់នេះបង្កឲ្យពលករចំណាកស្រុក និងថៅកែភ័យខ្លាច៕
