នាវាចម្បាំងអាមេរិក និងហ្វីលីពីន កាលពីថ្ងៃម្សិលមិញនេះ បានធ្វើសមយុទ្ធល្បាតរួមគ្នាមួយនៅក្នុងដែនទឹកស្ថិតនៅភាគខាងត្បូង ជាទីដែលគេស្គាល់ថា ជាមូលដ្ឋានរបស់ពួកបះបោរមូស្លីម ចំពេលដែលមានក្ដីកង្វល់កាន់តែខ្លាំងជុំវិញឥទ្ធិពលរបស់ពួកឥស្លាមជ្រុលនិយម និងចោរសមុទ្រនៅតំបន់នោះ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ដោយយោងតាមសេចក្ដីប្រកាសព័ត៌មានរបស់ស្ថានទូតអាមេរិកប្រចាំនៅហ្វីលីពីន AFP បានរាយការណ៍បន្តថា នាវាចម្បាំងនៃកងទ័ពជើងទឹកអាមេរិក និងនាវាចម្បាំងនៃកងទ័ពជើងទឹកហ្វីលីពីនបានធ្វើប្រតិបត្តិការល្បាតរួមគ្នានៅសមុទ្រស៊ូលូ ជាដែនទឹកស្ថិតនៅភាគខាងត្បូងហ្វីលីពីន និងជាទីដែលពួកបះបោរធ្វើប្រតិបត្តិការចាប់ជំរិតមនុស្ស។
ក្រុមអាប៊ូសាយយ៉ាហ្វ ដែលជាក្រុមជ្រុលនិយមស្ថិតនៅភាគខាងត្បូងបំផុតនៃប្រទេសហ្វីលីពីន តែងតែចាប់ជំរិតមនុស្សតាមនាវានៅសមុទ្រស៊ូលូនៅក្នុងរយៈពេលប៉ុន្មានខែថ្មីៗនេះ ហើយជួនកាល ពួកគេបានកាត់ក្បាលចំណាប់ខ្មាំងទៀតផង នៅពេលពួកគេមិនទទួលបានលុយកាក់នោះ៕
