ស្ពានមួយតម្លៃ ១២លានដុល្លារ ដែលសាងសង់ដោយក្រុមហ៊ុនចិននៅក្នុងប្រទេសកេនយ៉ា ត្រូវបានទូរទស្សន៍ CNN ផ្សាយថា បានបាក់ តែពីរសប្ដាហ៍ក្រោយពីប្រធានាធិបតីកេនយ៉ា លោក អ៊ូហ៊ូរូ កេនយ៉ាត់តា បានធ្វើដំណើរទៅត្រួតពិនិត្យស្ពាននោះ ដែលស្ថិតនៅភាគខាងលិចនៃប្រទេស។
ទូរទស្សន៍ CNN បានផ្សាយថា ស្ពានដែលបាក់ទាំងមិនទាន់សង់ហើយនេះ ត្រូវបានចាត់ទុកជារឿងអាម៉ាស់មួយសម្រាប់គណបក្សកាន់អំណាចនៅក្នុងប្រទេសកេនយ៉ា។
តាមការផ្សាយរបស់ទូរទស្សន៍ CNN ស្ពាននោះត្រូវបានសាងសង់ដោយក្រុមហ៊ុនចិនឈ្មោះ ក្រុមហ៊ុនវិស្វកម្ម និងសំណង់ឯនាយសមុទ្រ នៅក្នុងស្រុកប៊ូសៀ។ ស្ពាននោះ ត្រូវបានសាងសង់ឡើងដើម្បីភ្ជាប់ទៅតំបន់មួយ ដែលកំពុងខ្វះខាតការអភិវឌ្ឍនិងវិនិយោគពីរដ្ឋាភិបាល។
កាលពីឆ្នាំ២០១៤កន្លង មនុស្សរាប់សិបនាក់ ត្រូវបានគេរាយការណ៍ថាបានស្លាប់នៅក្នុងទន្លេ ដែលស្ពានឆ្លងកាត់នោះ បន្ទាប់ពីទូកមួយគ្រឿងបានក្រឡាប់លិច អំឡុងពេលឆ្លងទន្លេ៕