បន្ទាប់ពីបាញ់គ្រាប់មីស៊ីលនៅព្រឹកថ្ងៃនេះ កូរ៉េខាងជើងបានចេញមកអះអាងថា ខ្លួនបានបាញ់សាកល្បងដោយជោគជ័យនូវគ្រាប់មីស៊ីលអន្តរទ្វីប ដែលនេះមានន័យថា កូរ៉េខាងជើងឈានទៅរកការផលិតបានសម្រេចនូវគ្រាប់មីស៊ីលបំពាក់គ្រាប់បែកនុយក្លេអ៊ែរ ដែលអាចវាយប្រហារដល់ទឹកដីអាមេរិក។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ក្រុមអ្នកជំនាញអាមេរិកនិយាយថា គ្រាប់មីស៊ីលនោះអាចរត់ទៅដល់រដ្ឋអាឡាស្កា ហើយការបាញ់នោះកើតឡើងចំថ្ងៃដែលអាមេរិកប្រារព្ធទិវាបុណ្យឯករាជ្យជាតិរបស់គេ។
ការបាញ់គ្រាប់មីស៊ីលជាថ្មីពីសំណាក់កូរ៉េខាងជើង រឹតតែធ្វើឲ្យប្រធានាធិបតីអាមេរិក លោក ដូណាល់ ត្រាំ លែងទ្រាំបានតទៅហើយ ហើយជំរុញទៅចិនឲ្យបញ្ចប់បញ្ហានេះ។
ការដែលកូរ៉េខាងជើងអាចផលិតបានគ្រាប់មីស៊ីលអន្តរទ្វីបនោះ វានឹងក្លាយទៅជាការគំរាមកំហែងកាន់តែខ្លាំងពីសំណាក់រដ្ឋឯកោក្រីក្រមួយនេះ។
អ្នកប្រកាសព័ត៌មានតាមទូរទស្សន៍កូរ៉េខាងជើង បានប្រកាសថា ការបាញ់សាកល្បងគ្រាប់មីស៊ីលនេះ ស្ថិតក្រោមការត្រួតពិនិត្យពីមេដឹកនាំ គីម ជុងអ៊ុន។
នៅក្នុងសេចក្ដីប្រកាសព័ត៌មានមួយ បណ្ឌិតសភាវិទ្យាសាស្ត្រការពារជាតិកូរ៉េខាងជើង បាននិយាយថា គ្រាប់មីស៊ីលនោះ រត់បានចម្ងាយ ២៨០២គីឡូម៉ែត្រ៕
