កូរ៉េខាងជើងបានបាញ់គ្រាប់មីស៊ីលជាថ្មីម្ដងទៀតនៅថ្ងៃនេះ តែប៉ុន្មានថ្ងៃក្រោយពីមេដឹកនាំថ្មីកូរ៉េខាងត្បូង លោក មូន ជែអ៊ីន និងប្រធានាធិបតីអាមេរិក លោក ដូណាល់ ត្រាំ បានផ្ដោតទៅលើការគំរាមកំហែងពីក្រុងព្យុងយ៉ាងលើជំនួបលើកដំបូងរបស់មេដឹកនាំទាំងពីរនេះ។
យោធាកូរ៉េខាងត្បូង បាននិយាយថា ការបាញ់គ្រាប់មីស៊ីលនេះ បានកើតឡើងចំពេលដែលអាមេរិកត្រៀមរៀបចំរំលឹកបុណ្យឯករាជ្យជាតិរបស់ខ្លួនថ្ងៃទី០៤ ខែកក្កដា ហើយក៏ជាទង្វើបង្កហេតុថ្មីបំផុតដែលបានជំរុញឲ្យមានភាពតានតឹងកាន់តែខ្លាំងជុំវិញកម្មវិធីអភិវឌ្ឍន៍នុយក្លេអ៊ែររបស់កូរ៉េខាងជើង។
អគ្គមេបញ្ជាការកងទ័ពកូរ៉េខាងត្បូង បាននិយាយក្នុងសេចក្ដីប្រកាសព័ត៌មានមួយថា គ្រាប់មីស៊ីលដែលគេមិនទាន់ស្គាល់នោះ ត្រូវបានបាញ់ចេញពីទីតាំងមួយនៅជិតតំបន់ប៉ាងយ៉ុន នៅភាគខាងជើងខេត្តព្យ៉ុងហ្កាន ហើយបានធ្លាក់នៅសមុទ្រចិនខាងកើត។
អ្នកនាំពាក្យក្រសួងការពារជាតិជប៉ុន បាននិយាយថា គ្រាប់មីស៊ីលនោះ បានធ្លាក់នៅក្នុងតំបន់សេដ្ឋកិច្ចផ្ដាច់មុខរបស់ជប៉ុន៕