ប្រទេសអារ៉ាប់ចំនួន ៤ ដែលបានចោទប្រទេសកាតាថាបានគាំទ្រចលនាភេរវកម្មនោះ បានឯកភាពគ្នាបន្តដាក់ទណ្ឌកម្មទៅលើប្រទេសកាតារហូតដល់យប់ថ្ងៃអង្គារនេះ ដែលជាឱសានវាទសម្រាប់រដ្ឋាភិបាលក្រុងដូហា ឲ្យអនុវត្តតាមការទាមទារ ខណៈដែលប្រធានាធិបតីអាមេរិក លោក ដូណាល់ ត្រាំ បានបញ្ចេញសំឡេងព្រួយបារម្ភអំពីជម្លោះនេះទៅដល់ភាគីទាំងពីរ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
ចំណែកឯប្រទេសកាតាវិញ បានចាត់ទុកការចោទប្រកាន់នេះថា គ្មានមូលដ្ឋាន និងថា ការទាមទាររបស់ពួកគេ មានលក្ខណៈធ្ងន់ធ្ងរ ដែលពួកគេរៀបចំឡើងសម្រាប់ឲ្យកាតាច្រានចោលតែម្ដង។
ប្រទេសអារ៉ាប៊ីសាអ៊ូឌីត បារ៉ែន អេហ្ស៊ីប និងអារ៉ាប់រួម បានលើកឡើងពីលទ្ធភាពនៃការដាក់ទណ្ឌកម្មបន្ថែមប្រឆាំងនឹងប្រទេសកាតា ប្រសិនបើប្រទេសនេះមិនអនុវត្តទៅតាមការទាមទារ ១៣ចំណុច ដែលត្រូវបង្ហាញទៅរដ្ឋាភិបាលក្រុងដូហា តាមរយៈប្រទេសគុយវែត ដែលជាអ្នកដើរតួជាអ្នកសម្របសម្រួល។
យោងតាមសេចក្ដីប្រកាសរួមនៅលើទីភ្នាក់ងារព័ត៌មានអារ៉ាប៊ីសាអ៊ូឌី ប្រទេសទាំងបួននេះ បានឯកភាពទៅនឹងសំណើមួយធ្វើឡើងដោយប្រទេសគុយវែត ដើម្បីបន្តឱសានវាទ ៤៨ម៉ោងបន្ថែមទៀត។
ប្រទេសទាំងនោះមិនបានបញ្ជាក់ថា តើពួកគេនឹងដាក់ទណ្ឌកម្មបែបណាបន្ថែមទៀតទៅលើទីក្រុងដូហាទេ ប៉ុន្តែ ក្រុមធនាគារពាណិជ្ជកម្មនៅក្នុងតំបន់ជឿថា ធនាគារនៅអារ៉ាប៊ីសាអ៊ូឌីត អារ៉ាប់រួម និងបារែន អាចទទួលបានសេចក្ដីណែនាំផ្លូវការឲ្យដកប្រាក់បញ្ញើ និងប្រាក់កម្ចីទាំងអស់ចេញពីប្រទេសកាតា៕