ប្រធានាធិបតីកូរ៉េខាងត្បូង លោក មូន ជែអ៊ីន បាននិយាយថា កូរ៉េខាងជើងមានឱកាសចុងក្រោយក្នុងការចូលរួមក្នុងការចរចាជាមួយភាគីខាងក្រៅ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីការិយាល័យប្រធានាធិបតីកូរ៉េខាងត្បូង អំឡុងពេលជំនួបជាមួយអតីតប្រធានាធិបតីអាមេរិក លោក បារ៉ាក់ អូបាម៉ា។
លោក អូបាម៉ា កំពុងស្ថិតក្នុងដំណើរនៅទីក្រុងសេអ៊ូលនៅសប្ដាហ៍នេះ ដើម្បីនិយាយក្នុងវេទិកាមួយរៀបចំដោយកាសែតកូរ៉េខាងត្បូង ជាទីដែលលោកថ្លែងថា ការព្យាយាមអភិវឌ្ឍន៍គ្រាប់បែកនុយក្លេអ៊ែររបស់កូរ៉េខាងជើង ពុំបានធ្វើអ្វីធានាដល់ពលរដ្ឋកូរ៉េខាងជើងនោះទេ។
ជំនួយការនៅឯវិមានប្រធានាធិបតីកូរ៉េខាងត្បូង បានប្រាប់អ្នកសារព័ត៌មានថា នៅក្នុងជំនួបជាមួយលោក អូបាម៉ា នោះ លោក មូន បានសង្ខេបឡើងវិញអំពីជំនួបរបស់លោកជាមួយប្រធានាធិបតីអាមេរិក លោក ដូណាល់ ត្រាំ។
កូរ៉េខាងជើងកំពុងតែព្យាយាមផលិតអាវុធនុយក្លេអ៊ែរ និងគ្រាប់មីស៊ីល ចាប់តាំងពីដើមឆ្នាំមុន ដោយមិនខ្វល់ទៅនឹងការគំរាមកំហែងពីទណ្ឌកម្មដាក់ដោយអង្គការសហប្រជាជាតិ និងការគំរាមប្រើកម្លាំងទ័ពពីអាមេរិកនោះឡើយ៕