សេចក្ដីរាយការណ៍បានឲ្យដឹងថា វៀតណាមគ្រោងនឹងហាមឃាត់ការប្រើប្រាស់ម៉ូតូនៅទីក្រុងហាណូយនៅឆ្នាំ២០៣០ខាងមុខ ដោយថា ដើម្បីកាត់បន្ថយការកកស្ទះចរាចរណ៍។
សារព័ត៌មានវៀតណាម បានដកស្រង់សម្ដីអភិបាលរងក្រុងហាណូយ លោក ង្វៀន ធៀនមិញ ដែលបាននិយាយថា គ្រោះថ្នាក់ចរាចរណ៍ប្រហែល ៧០ភាគ មានពាក់ព័ន្ធនឹងម៉ូតូ ដែលបង្ហាញថា អ្នកបើកបរម៉ូតូ ប្រឈមមុខនឹងហានិភ័យនៃគ្រោះថ្នាក់ចរាចរណ៍ខ្ពស់។
ចំណែកឯមន្ត្រីផ្នែកដឹកជញ្ជូននៅទីក្រុងហាណូយ ត្រូវបានដកស្រង់សម្ដីចុះផ្សាយថា មន្ទីរដឹកជញ្ជូននឹងពិចារណាលើគ្រប់មតិទាំងអស់របស់សមាជិកនៃក្រុមប្រឹក្សាភិបាលក្រុង ដើម្បីកែលម្អសំណើកែប្រែនេះ។
បើតាមគម្រោងដែលត្រូវបានសារព័ត៌មានវៀតណាមឃើញនោះ បានឲ្យដឹងថា ការប្រើប្រាស់ម៉ូតូនៅតំបន់មួយចំនួនក្នុងទីក្រុងហាណូយ នឹងត្រូវបានកំណត់បន្តិចម្ដងៗចាប់ពីឆ្នាំ២០១៧ ហើយឈានទៅហាមឃាត់ទាំងស្រុងនៅចុងឆ្នាំ២០៣០។
លទ្ធផលនៃការស្ទង់មតិមួយទៅលើមនុស្សជាង ១៥៣០០គ្រួសារ កាលពីខែមុន បានរកឃើញថា ពលរដ្ឋប្រហែល ៨៤ភាគរយនៅទីក្រុងហាណូយឯកភាពលើការដាក់កម្រិតចំនួនម៉ូតូផ្ទាល់ខ្លួន ហើយពលរដ្ឋដល់ទៅ ៩០ភាគរយ បានឆ្លើយថា ពួកគេឯកភាពទៅនឹងសំណើហាមឃាត់ការប្រើប្រាស់ម៉ូតូផ្ទាល់ខ្លួន៕
