ប្រមុខអង្គការសហប្រជាជាតិនៅថ្ងៃនេះ បានថ្កោលទោសយ៉ាងខ្លាំងក្លាចំពោះការបាញ់គ្រាប់មីស៊ីលរបស់កូរ៉េខាងជើង ដែលប្រទេសនេះហៅថា ជាការសាកល្បងមីស៊ីលឆ្លងទ្វីបដ៏ជោគជ័យជាលើកដំបូង។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយទ័ររ៉េស បានថ្លែងថា ទង្វើបែបនេះ គឺជាការរំលោភបំពានដ៏ធ្ងន់ធ្ងរមួយទៀតទៅនឹងសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងបន្តជំរុញស្ថានការណ៍ឲ្យកាន់តែគ្រោះថ្នាក់។
លោកបន្ថែមថា មេដឹកនាំកូរ៉េខាងជើងត្រូវតែកាត់បន្ថយទង្វើបង្កហេតុបន្ថែមទៀត និងអនុវត្តទៅតាមកាតព្វកិច្ចរបស់ខ្លួននៅលើឆាកអន្តរជាតិ។
ក្រុមប្រឹក្សាសន្តិសុខអង្គការសហប្រជាជាតិ ត្រូវបានគេរំពឹងនឹងជួបប្រជុំគ្នានៅថ្ងៃនេះ ក្នុងកិច្ចប្រជុំបន្ទាន់បិទទ្វារមួយ បន្ទាប់ពីក្រុងព្យុងយ៉ាងប្រកាសថា ខ្លួនសាកល្បងបានជោគជ័យគ្រាប់មីស៊ីលអន្តរទ្វីបជាលើកដំបូង៕