បន្ទាប់ពីកូរ៉េខាងជើងបាញ់គ្រាប់មីស៊ីលឆ្លងទ្វីបជាលើកដំបូងនោះ អាមេរិកបានបញ្ជាក់ថា ខ្លួនបានព្រមានអំពីការកើនឡើងនៃការគំរាមកំហែងពីក្រុងព្យុងយ៉ាង ហើយបញ្ជាក់ថា អាមេរិកនឹងមិនទទួលយកកូរ៉េខាងជើងនោះឡើយ។ នេះដោយយោងតាមការចុះផ្សាយរបស់ទីភ្នាក់ងារ AFP។
ការដែលកូរ៉េខាងជើងមានមីស៊ីលឆ្លងទ្វីបនោះ បង្ហាញនូវរបត់ថ្មីមួយសម្រាប់ប្រទេសឯកោក្រីក្រមួយនេះ ខណៈដែលក្រុងព្យុងយ៉ាងជំរុញកម្មវិធីនុយក្លេអ៊ែរ ដោយថា ជាការចាំបាច់ដើម្បីប្រឆាំងនឹងការឈ្លានពាន។
ក្រុមអ្នកជំនាញខ្លះបាននិយាយថា គ្រាប់មីស៊ីលបែបនេះ អាចរត់ដល់រដ្ឋអាឡាស្កា ឬក៏អាចរត់ទៅដល់ដែនដីគោកអាមេរិកតែម្ដង។ ប៉ុន្តែ មានមន្ទិលសង្ស័យយ៉ាងច្រើនចំពោះអ្វីដែលកូរ៉េខាងជើងបានអះអាងអំពីសមត្ថភាពនៃគ្រាប់មីស៊ីលរបស់ខ្លួនដែលអាចវាយប្រហារដល់គ្រប់កន្លែងនៃពិភពលោកនោះ។
ទីភ្នាក់ងារព័ត៌មានកណ្ដាលកូរ៉េ បានរាយការណ៍ថា មេដឹកនាំកូរ៉េខាងជើងបានចាត់ទុកមីស៊ីលនេះថា ជាអំណោយសម្រាប់អាមេរិក នៅថ្ងៃបុណ្យឯករាជ្យ។
រដ្ឋមន្ត្រីការបរទេសអាមេរិក បានថ្លែងថា សហរដ្ឋអាមរិកថ្កោលទោសយ៉ាងខ្លាំងក្លាចំពោះការបាញ់គ្រាប់មីស៊ីលឆ្លងទ្វីបរបស់កូរ៉េខាងជើង។ លោកបន្តថា ការសាកល្បងគ្រាប់មីស៊ីលនេះ បង្ហាញឲ្យឃើញនូវការគំរាមកំហែងកាន់តែខ្លាំងទៅលើអាមេរិក សម្ព័ន្ធមិត្ត និងដៃគូរបស់ខ្លួន បណ្ដាប្រទេសនៅក្នុងតំបន់ និងពិភពលោក៕