រញ្ជួយដីកម្លាំង៥,៩ រិច្ឆទ័រ កើតឡើងនៅលើកោះភាគកណ្តាលនៃប្រទេសហ្វីលីពីន នៅព្រឹកថ្ងៃចន្ទនេះ បន្តទៀតក្រោយពេលការញ្ជួយកាលពីសប្តាហ៍មុន មិនទាន់មានរបាយការណ៍នៃចំនួនអ្នកស្លាប់រងរបួសឬខូចខាតទ្រព្យសម្បត្តិច្បាស់លាស់នៅឡើយ។
អ្នកជំនាញភូមិសាស្ត្ររបស់សហរដ្ឋអាមេរិកថ្លែងថា តាមការសិក្សាការញ័រខ្លាំងគឺនៅកោះ Leyte នៅជិតទីក្រុង Ormoc ដែលមានមនុស្សរស់នៅប្រមាណ២០០ ០០០នាក់។ ក្រុមអ្នកជំនាញបញ្ជាក់ថា ការរញ្ជួយដីនេះចាប់ផ្តើមម៉ោង៩:៤១នាទីព្រឹក ដែលញ័រក្នុងជម្រៅ១២,៧គីឡូម៉ែត្រ។
តំបន់ធំរបស់កោះ Leyte ជាភូមិមានពលរដ្ឋប្រមាណ២លាននាក់ និងផ្នែកខ្លះនៅភាគកណ្តាលហ្វីលីពីននៅតែមិនមានអគ្គិសនីប្រើប្រាស់ បន្ទាប់ពីការរញ្ជួយដីបំផ្លាញកន្លែងផលិតអគ្គិសនីកាលពីសប្តាហ៍មុន៕