កូរ៉េខាងជើងព្រមានបាញ់​នុយក្លេអ៊ែលើកន្លែងសមយុទ្ធរបស់អាមេរិក​

កូរ៉េខាងជើងកាលពីថ្ងៃអាទិត្យម្សិលមិញ បានលើកឡើងថា សមយុទ្ធបាញ់គ្រាប់ពិតរបស់សហរដ្ឋអាមេរិក និង កូរ៉េខាងត្បូង គឺជាការបង្ហាញពីសញ្ញាគំរាមកំហែងប្រឆាំងទីក្រុងព្យុងយ៉ាង ដែលកូរ៉េខាងជើងចោទថា អាមេរិកកំពុងតែរុញស្ថានការណ៍ឲ្យធ្លាក់ដល់ការចាប់ផ្តើមសង្គ្រាមនុយក្លេអ៊ែ។​

សម្ព័ន្ធមិត្តអាមេរិកនិងកូរ៉េខាងជើងចាប់ផ្តើមធ្វើសមយុទ្ធស្របពេល ដែល​ភាពតានតឹងកំពុងកើនឡើងនៅឧបទ្វីបកូរ៉េ ខណៈកូរ៉េខាងជើងបាញ់សាកល្បងអាវុធមីស៊ីលអន្តរទ្វីបជាលើកទី១កាលពីសប្តាហ៍មុន ហើយអាវុធរបស់កូរ៉េខាងជើងនោះត្រូវបានអ្នកជំនាញនិយាយថា អាចនាំក្បាលគ្រាប់នុយក្លេអ៊ែ និងបាញ់ដល់សហរដ្ឋអាមេរិក។​ នេះបើតាមទីភ្នាក់ងារព័ត៌មាន AFP។​

កាលពីថ្ងៃសៅរ៍អាមេរិក រៀបចំធ្វើសមយុទ្ធឡើងរួមជាមួយកូរ៉េខាងត្បូង ដើម្បីឆ្លើយតបភ្លាម ពីលទ្ធភាពនៃគ្រាប់មីស៊ីលរបស់កូរ៉េខាងជើង ដែលសមយុទ្ធនេះផ្តោតលើការទប់ទល់ជាមួយការវាយប្រហារដោយមីស៊ីលតាមអាកាសនិងបាញ់ក្រោមដី៕