នាយករដ្ឋមន្ត្រីអ៊ីរ៉ាក់ លោក ហៃឌ័រ អាល់ អាបាឌី បានប្រកាសអំពីជ័យជម្នះទៅលើអំពើឃោឃៅ និងអំពើភេរវកម្ម នៅទីក្រុងមូស៊ូល កាលពីថ្ងៃម្សិលមិញនេះ ដោយលោកប្រកាសថា កងទ័ពរដ្ឋាភិបាលបានបញ្ចប់ការគ្រប់គ្រងរបស់ក្រុមរដ្ឋឥស្លាមទៅលើទីក្រុងធំលំដាប់ទីពីររបស់ប្រទេសនេះ។ នេះដោយយោងតាមការចុះផ្សាយរបស់ទីភ្នាក់ងារ AFP។
ឈរជាមួយសមាជិកនៃកងកម្លាំងសន្តិសុខ លោក អាបាឌី បានកោតសរសើរចំពោះការដណ្ដើមបានទីក្រុងមូស៊ូលមកវិញ បន្ទាប់ពីពួកឧទ្ទាមរដ្ឋឥស្លាម បានវាយយកឈ្នះកងទ័ពរដ្ឋាភិបាលអ៊ីរ៉ាក់ កាលពី ៣ឆ្នាំមុន។
លោក អាបាឌី ថ្លែងថា ជ័យជម្នះនេះ គឺជាជ័យជម្នះលើភាពងងឹត ជ័យជម្នះលើអំពើឃោឃៅ និងចលនាភេរវកម្ម។
លោកបន្ថែមថា ប្រតិបត្តិការទាំងនេះ ត្រូវបានធ្វើឡើងទៅតាមផែនការ និងអនុវត្តបានជោគជ័យ៕