ប្រទេសម៉ាឡេស៊ី បានស្ថិតក្នុងស្ថានភាពប្រុងប្រយ័ត្នចំពោះការរត់គេចខ្លួនរបស់ពួកឧទ្ទាម បន្ទាប់ពីកងកម្លាំងរដ្ឋាភិបាលអ៊ីរ៉ាក់ បានប្រកាសជ័យជម្នះទៅលើក្រុមរដ្ឋឥស្លាម នៅទីក្រុងមូស៊ូល និងរ៉ាហ្កា។ នេះដោយយោងតាមការចុះផ្សាយរបស់សារព័ត៌មានសិង្ហបុរី Channel News Asia។
រដ្ឋមន្ត្រីការពារជាតិ លោក ហ៊ីសហាំមូឌីន ហ៊ូសេន បាននិយាយកាលពីថ្ងៃម្សិលមិញនេះថា របាយការណ៍ចារកម្ម បានបញ្ជាក់ថា ពួកសកម្មប្រយុទ្ធរដ្ឋឥស្លាមដែលកំពុងរត់គេចខ្លួននៅតំបន់មជ្ឈឹមបូព៌ានោះ មានផែនការផ្លាស់ប្ដូរមូលដ្ឋានរបស់ពួកគេមកកាន់តំបន់អាស៊ីអាគ្នេយ៍។
នៅក្នុងកិច្ចប្រជុំនៅទីក្រុងគួឡាឡំពួរកាលពីថ្ងៃម្សិលមិញនេះ លោកប្រកាសថា ក្រុមរដ្ឋឥស្លាម គឺជាសត្រូវលេខ១របស់រដ្ឋាភិបាល។
លោក ហ៊ីសហាំមូឌីន បាននិយាយបន្តថា ជ័យជម្នះទៅលើពួកបះបោរនៅទីក្រុងមូស៊ូល ទីក្រុងរ៉ាហ្កា និងអាឡិបប៉ូ បានបញ្ជូនសមាជិកពួកបះបោរជាច្រើននាក់រត់គេចពីតំបន់មជ្ឈឹមបូព៌ា។
លោកបន្ថែមថា អ្វីដែលកើតឡើងនៅតំបន់មជ្ឈឹមបូព៌ា បានផលប៉ះពាល់ដោយផ្ទាល់ដល់ម៉ាឡេស៊ី ដែលធ្វើឲ្យម៉ាឡេស៊ីត្រូវតែប្រុងប្រយ័ត្នខ្ពស់បំផុត៕