កងទ័ពហ្វីលីពីនបាននិយាយថា ក្មេងៗនិងចំណាប់ខ្មាំង ត្រូវបានគេបង្ខំឲ្យចូលរួមប្រយុទ្ធជាមួយពួកបះបោរប្រដាប់អាវុធ នៅក្នុងសមរភូមិនៅទីក្រុងមួយនៅភាគខាងត្បូង ដែលបានអូសបន្លាយពេលអស់រយៈពេល ៧សប្ដាហ៍មកហើយ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ពួកបះបោរឥស្លាមជ្រុលនិយម បានដណ្ដើមកាន់កាប់ទីក្រុងម៉ារ៉ាវី ចាប់តាំងពីថ្ងៃទី២៣ ខែឧសភាមកម៉្លេះ ក្នុងបំណងបង្កើតខេត្តមួយសម្រាប់ខ្លួន ហើយបានចាប់បង្ខាំងមនុស្សជាង ១០០នាក់ នៅក្នុងទីក្រុងនេះ បើទោះបីជាទាហានរដ្ឋាភិបាលប្រឹងប្រែងបណ្ដេញពួកគេចេញក៏ដោយ។
អ្នកនាំពាក្យយោធាហ្វីលីពីន និយាយថា ពួកសកម្មប្រយុទ្ធខ្លះ មានវ័យក្មេងៗ ដែលអាចត្រូវបានគេជ្រើសរើស និងហ្វឹកហ្វឺនឲ្យប្រើប្រាស់កាំភ្លើង នៅពេលពួកគេនៅជាក្មេងៗនៅឡើយ។
យោងតាមតួលេខរបស់រដ្ឋាភិបាលកាលពីថ្ងៃម្សិលមិញនេះ មនុស្សជាង ៥០០នាក់ ត្រូវបានសម្លាប់នៅក្នុងការប្រយុទ្ធគ្នា ក្នុងនោះមានទាហាន និងប៉ូលិស ៨៩នាក់ ជនស៊ីវិល ៣៩នាក់ និងពួកបះបោរ ៣៧៩នាក់៕