រដ្ឋមន្ត្រីថ្មីនៃគ្រួសារ និងសមភាពយេនឌ័ររបស់កូរ៉េខាងត្បូង បាននិយាយថា ផែនការមួយត្រូវបានបង្កើតឡើងដើម្បីកសាងសារមន្ទីរមួយនៅទីក្រុងសេអ៊ូល ដើម្បីរំឭកដល់អតីតស្ត្រីកូរ៉េ ដែលត្រូវបានបង្ខំឲ្យបម្រើផ្លូវភេទទាហានជប៉ុន។ នេះដោយយោងតាមការចុះផ្សាយរបស់ទីភ្នាក់ងារព័ត៌មានជប៉ុនឃ្យូដូ ដោយផ្អែកតាមការផ្សាយរបស់យ៉ុនហាប់។
យ៉ុនហាប់ បានផ្សាយបន្តថា អ្នកស្រី ជុង យ៉ុន បេក ដែលស្ថិតក្នុងដំណើរទៅទស្សនាមណ្ឌលចែករំលែកសម្រាប់ស្ត្រីរងគ្រោះនោះ បាននិយាយថា សារមន្ទីររូបភាព នឹងក្លាយជាកន្លែងដ៏ទាក់ទាញ ដែលរំឭកឡើងពីមនុស្សរងការរំលោភបំពានសិទ្ធិមនុស្ស អំឡុងសង្គ្រាម។
ថ្លែងទៅកាន់សារព័ត៌មានអំឡុងដំណើរនោះ អ្នកស្រី ជុង ប្រាប់ថា បញ្ហារបស់ស្ត្រីបម្រើផ្លូវភេទ មិនមែនជាបញ្ហារវាងកូរ៉េខាង និងជប៉ុនទៀតនោះទេ ប៉ុន្តែ ជាបញ្ហាអន្តរជាតិ។
អ្នកស្រី ជុង គឺជាសាស្ត្រាចារ្យប្រវត្តិសាស្ត្រ និងជាសកម្មជនសិទ្ធិស្ត្រី ដែលបានចូលកាន់តំណែងកាលពីថ្ងៃសុក្រសប្ដាហ៍មុន។ អ្នកស្រីថ្លែងថា អ្នកស្រីសង្ឃឹមថា ការងារសាងសង់សារមន្ទីរ នឹងចាប់ផ្ដើមឆាប់ៗ៕
