អាជ្ញាធរតួកគី បានបញ្ជាឲ្យចាប់ខ្លួនមនុស្ស១០៥នាក់ ធ្វើការនៅក្នុងក្រុមហ៊ុនបច្ចេកវិទ្យាមួយ ដែលត្រូវបានគេជឿថា មានជាប់ពាក់ព័ន្ធនឹងការប៉ុនប៉ងធ្វើរដ្ឋប្រហារយោធា កាលពីមួយឆ្នាំមុន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដោយផ្អែកទៅតាមការផ្សាយរបស់អានដូលូនៅថ្ងៃនេះ។
កាលពីឆ្នាំមុន ប៉ូលិសតួកគីបានចាប់ខ្លួនមនុស្សជាច្រើន ដែលត្រូវបានសង្ស័យថា មានទំនាក់ទំនងនឹងបុព្វឥស្លាម ហ្វេទូឡា ហ្គូឡេន ដែលរដ្ឋាភិបាលក្រុងអង់ការ៉ា ចោទប្រកាន់ថា បានរៀបចំរដ្ឋប្រហារមិនបានសម្រេចកាលពីថ្ងៃទី១៥ ខែកក្កដា។
ទីភ្នាក់ងារព័ត៌មានតួកគីអានាដូលូ បានផ្សាយថា ប៉ូលិសបានឃុំខ្លួនមនុស្ស ៥២នាក់ ក្នុងចំណោម ១០៥នាក់ ស្ថិតនៅក្រោមការស្វែងរកចាប់ខ្លួននៅតាមបណ្ដាខេត្ត ៨ ក្នុងនោះមានអតីតបុគ្គលិកនៃក្រុមប្រឹក្សាស្រាវជ្រាវវិទ្យាសាស្ត្ររបស់ប្រទេសនេះ និងអាជ្ញាធរទូរគមនាគមន៍។
Reuters បានផ្សាយថា មនុស្សប្រហែល ៥ម៉ឺននាក់ ត្រូវបានចាប់ខ្លួន ហើយបុគ្គលិករដ្ឋ ១៥ម៉ឺននាក់ មានគ្រូបង្រៀន ចៅក្រម និងយោធាផងដែរ ត្រូវបានបណ្ដេញចេញពីមុខតំណែង នៅក្រោមច្បាប់សឹកកាលពីចុងខែកក្កដាឆ្នាំមុន៕
