ប្រទេសជប៉ុន បានផ្ញើកំណត់ហេតុកាទូតតវ៉ាទៅកូរ៉េខាងត្បូង ជុំវិញការការគាំទ្ររបស់កូរ៉េខាងត្បូងទៅការគម្រោងចុះបញ្ជីឯកសារនៅអង្គការសហប្រជាជាតិ ពាក់ព័ន្ធនឹងស្ត្រី ដែលត្រូវបានបង្ខំឲ្យធ្វើជាទាសករផ្លូវភេទបម្រើទាហានជប៉ុន អំឡុងសង្គ្រាមលោកលើកទី២។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ប្រតិកម្មរបស់ក្រុងតូក្យូនេះ បានកើតឡើងក្រោយរដ្ឋមន្ត្រីក្រសួងសមភាពយេនឌ័រកូរ៉េខាងត្បូង កាលពីថ្ងៃចន្ទកន្លងមកនេះ បានបង្ហាញជំហរគាំទ្រកិច្ចខិតខំប្រឹងប្រែងការដាក់បញ្ចូលឯកសារនានា ទៅក្នុងបញ្ជី “ការចងចាំពិភពលោក” របស់អង្គការយូណេស្កូ។
រដ្ឋមន្ត្រីការបរទេសជប៉ុន លោក ហ៊្វូមីអូ គីហ្ស៊ីដា បានប្រាប់អ្នកសារព័ត៌មានថា ការគាំទ្រការដាក់បញ្ចូលឯកសារនេះ អាចប្រឆាំងទៅនឹងបេសកកម្ម និងគោលបំណងដើមនៃការបង្កើតអង្គការយូណេស្កូ ដែលជំរុញឲ្យមានមិត្តភាព និងការយោគយល់គ្នាក្នុងចំណោមប្រទេសជាសមាជិក។
ក្រៅពីចុះបញ្ជីឯកសារទាំងនេះ រដ្ឋមន្ត្រីសមភាពយេនឌ័រកូរ៉េខាងត្បូង អ្នកស្រី ជុង យ៉ុនបេក ក៏បានជំរុញការកសាងសារមន្ទីរសម្រាប់ជាការចងចាំដល់ស្ត្រីទាំងនោះផងដែរ។
ស្ថានភាពស្ត្រីនាពេលនោះ គឺជាបញ្ហាប៉ះពាល់អារម្មណ៍ធំធេង ដែលលង់បន្លាចទំនាក់ទំនងរវាងប្រទេសទាំងពីរអស់ជាច្រើនទសវត្សរ៍មកហើយ ដែលប្រទេសទាំងពីរនេះសុទ្ធតែជាសម្ព័ន្ធមិត្តរបស់អាមេរិក។
ក្រុមអ្នកប្រវត្តិសាស្ត្រ បាននិយាយថា ស្ត្រីដល់ទៅ ២សែននាក់ ត្រូវបានបង្ខំឲ្យធ្វើការក្នុងផ្ទះបនទាហាននៅទូទាំងតំបន់អំឡុងពេលសង្គ្រាម។ ស្ត្រីភាគច្រើនមកពីកូរ៉េ ប៉ុន្តែ ក៏មានមកពីប្រទេសផ្សេងទៀតនៅតំបន់អាស៊ី ដូចជា ចិន ជាដើម៕
