នាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាប នៅថ្ងៃនេះ បានធ្វើដំណើរទៅមើលតំបន់ដែលរងគ្រោះដោយទឹកជំនន់អស់រយៈពេលប៉ុន្មានថ្ងៃមកហើយនេះ និងបានសន្យាថា រដ្ឋាភិបាលនឹងធ្វើអ្វីៗគ្រប់យ៉ាងតាមតែអាចធ្វើទៅបានដើម្បីកសាងតំបន់នោះឡើងវិញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ភ្លៀងធ្លាក់ជោគជាំចាប់តាំងពីមួយសប្ដាហ៍កន្លងមកនោះ បានបង្កឲ្យមានការរអិលបាក់ឌី និងទឹកជំនន់លិចភាគនិរតីនៃកោះឃ្យូស៊ូ ដោយបានបង្ខំប្រជាជនជាង ៤សែននាក់ ឲ្យចាកចេញពីផ្ទះសម្បែងរបស់ពួកគេ។
មនុស្សដល់ទៅ ២៥នាក់ ត្រូវបានសម្លាប់ ហើយ ២៣នាក់ទៀត កំពុងបាត់ខ្លួននៅឡើយ។
លោក អាបេ ដែលកម្រិតប្រជាប្រិយភាពរបស់លោកធ្លាក់ចុះដល់កម្រិតទាបបំផុតគិតចាប់តាំងពីឡើងកាន់តំណែងឆ្នាំ២០១២មកនោះ បានកាត់បន្ថយដំណើរនៅតំបន់អឺរ៉ុបមួយថ្ងៃ ដោយសារគ្រោះមហន្តរាយនេះ ហើយបានធ្វើដំណើរទៅមើលតំបន់រងគ្រោះមិនដល់ ២៤ម៉ោងផង ក្រោយពីរូបលោកវិលត្រឡប់ទៅដល់ប្រទេសវិញ។
ទាហាន ប៉ូលិស និងក្រុមពន្លត់អគ្គិភ័យប្រហែល ១១០០០នាក់ កំពុងប្រយុទ្ធនឹងល្បាប់ភក់ និងគំនរកម្ទេចកម្ទីនៅតំបន់ជនបទ ដោយបានព្យាយាមស្វែងរកអ្នកកំពុងបាត់ខ្លួន៕
