ក្រុមហ៊ុនអាកាសចរណ៍ AirAsia នៅក្នុងប្រទេសឥណ្ឌា បាននិយាយថា បុរសម្នាក់បានព្យាយាមបើកទ្វារអាសន្ននៅលើយន្តហោះ ខណៈដែលយន្តហោះកំពុងហោះហើរលើអាកាស ដោយបណ្ដាលឲ្យអ្នកដំណើរ និងបុគ្គលិកបម្រើការលើយន្តហោះនោះរងរបួស នៅពេលពួកគេព្យាយាមរារាំងបុរសម្នាក់នោះ ខណៈពេលយន្តហោះប្រុងប្រៀបចុះចត។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ក្រោយពីកើតហេតុ បុរសឈ្មោះ អាហ្វតាប់ អាម៉េដ អាយុ ៣២ឆ្នាំ ត្រូវបានចាប់ខ្លួន និងប្រគល់ទៅឲ្យសន្តិសុខព្រលានយន្តហោះ ស្ថិតនៅភាគខាងកើតទីក្រុងរ៉ាន់ជី កាលពីល្ងាចថ្ងៃចន្ទកន្លងមកនេះ។
អ្នកនាំពាក្យក្រុមហ៊ុន AirAsia បាននិយាយក្នុងសេចក្ដីប្រកាសព័ត៌មានមួយថា ក្រុមហ៊ុនបញ្ជាក់ថា យន្តហោះនោះជួបប្រទះនឹងអ្នកដំណើរគ្មានរបៀបរៀបរយម្នាក់ នៅលើជើងហោះហើរពីទីក្រុងញូវដេលី ទៅកាន់ទីក្រុងរ៉ាន់ជី កាលពីថ្ងៃទី១០ ខែកក្កដា។
ក្រុមហ៊ុននេះរៀបរាប់ថា នៅអំឡុងពេលចុះចតនៅឯទីក្រុងរ៉ាន់ជី អ្នកដំណើរគ្មានសណ្ដាប់ធ្នាប់នោះត្រូវបានប្រគល់ទៅឲ្យសន្តិសុខឥណ្ឌា ដើម្បីស៊ើបអង្កេតបន្ត។
ទោះជាយ៉ាងណា ក្រុមមន្ត្រីពុំបាននិយាយអំពីភិនភាគនៃអ្នកដំណើរដែលចាប់ខ្លួន ផលវិបាកកើតឡើងក្រោយហេតុការណ៍នោះ ឬក៏មូលហេតុដែលបុរសម្នាក់នោះព្យាយាមបើកទ្វារនោះទេ៕
