រដ្ឋាភិបាលយោធាថៃ កាលពីថ្ងៃម្សិលមិញនេះ បានអនុម័តកញ្ចប់ទឹកប្រាក់ ៥.២ពាន់លានដុល្លារ ដើម្បីកសាងផ្លូវរថភ្លើងល្បឿនលឿនមួយ ដែលនឹងភ្ជាប់ទីក្រុងបាងកក ទៅនឹងភាគខាងត្បូងប្រទេសចិន ដែលជាគម្រោងហេដ្ឋារចនាសម្ព័ន្ធដ៏ធំមួយជាមួយក្រុងប៉េកាំង ដែលត្រូវបានពន្យាពេល។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
គម្រោងផ្លូវរថភ្លើងនេះ គឺជាផ្នែកមួយនៃផែនការផ្លូវរថភ្លើងដ៏ធំប្រចាំតំបន់របស់ចិន ដើម្បីកសាងបណ្ដាញផ្លូវរថភ្លើងល្បឿនលឿនភ្ជាប់ទីក្រុងគួនមីង នៅភាគខាងត្បូង ទៅនឹងប្រទេសឡាវ ថៃ ម៉ាឡេស៊ី និងសិង្ហបុរី។
ការសាងសង់ បានចាប់ផ្ដើមរួចរាល់ហើយនៅក្នុងប្រទេសឡាវ ប៉ុន្តែ ខ្សែរថភ្លើងនៅក្នុងប្រទេសថៃ បានរាំងស្ទះប៉ុន្មានឆ្នាំមកហើយដោយសារតែបញ្ហាហិរញ្ញវត្ថុ លក្ខខណ្ឌកម្ចី និងបទប្បញ្ញត្តិពលកម្មនៅក្នុងប្រទេសថៃ។
ការអនុម័តកញ្ចប់ថវិកាពីគណៈរដ្ឋមន្ត្រីថៃ បានកើតឡើងបន្ទាប់ពីនាយករដ្ឋមន្ត្រី ប្រាយុទ្ធ ចាន់អូចា បានសម្រេចកាលពីខែមុន ដើម្បីត្រួសត្រាយបញ្ហាផ្លូវច្បាប់ និងបច្ចេកទេសសម្រាប់ទម្លុះទម្លាយកិច្ចព្រមព្រៀងនេះ។
អនុប្រធានខុទ្ទកាល័យនាយករដ្ឋមន្ត្រី លោក កូបសាក់ ផុត្រាកុល បាននិយាយថា គណៈរដ្ឋមន្ត្រីបានអនុម័តផែនការមួយនៃផ្លូវរថភ្លើងល្បឿនលឿន ពីបាងកក ទៅកូរ៉ាត់ ជាមួយកញ្ចប់ទឹកប្រាក់ ១៧៩ពាន់លានបាត (៥.២ពាន់លានដុល្លារ) សម្រាប់ផែនការ ៤ឆ្នាំ។
ដំណាក់កាលដំបូងនៃផ្លូវរថភ្លើងល្បឿនលឿនចម្ងាយ ២៥០គីឡូម៉ែត្រ នឹងត្រូវកសាងពីទីក្រុងបាងកក ទៅខេត្តនគរាជសីមា ស្ថិតនៅភាគឦសានប្រទេស៕