ក្រុមមន្ត្រីនិយាយកាលពីថ្ងៃម្សិលមិញថា យោធាអាមេរិកបានធ្វើតេស្តសាកល្បងដោយជោគជ័យនូវប្រព័ន្ធស្កាត់គ្រាប់មីស៊ីល ខណៈដែលមានភាពតានតឹងកាន់តែខ្លាំង ក្រោយពីកូរ៉េខាងជើងបាញ់សាកល្បងគ្រាប់មីស៊ីលឆ្លងទ្វីប ដែលអាចរត់ទៅដល់រដ្ឋអាឡាស្កា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP ផ្សាយបន្តថា ការសាកល្បងប្រព័ន្ធការពារមីស៊ីលនេះ ត្រូវបានគេមើលឃើញថា បាញ់ចំគោលដៅគ្រាប់មីស៊ីលនៅលើអាកាស នៅលើមហាសមុទ្រប៉ាស៊ីហ្វិក ស្ថិតនៅភាគខាងជើងរដ្ឋហាវ៉ៃ។
ទីភ្នាក់ងារប្រព័ន្ធការពារមីស៊ីលអាមេរិក បាននិយាយក្នុងសេចក្ដីប្រកាសព័ត៌មានថា ប្រព័ន្ធស្កាត់មីស៊ីលនេះ បានតាមចាប់ និងបាញ់កម្ទេចចំគោលដៅ។
ប្រព័ន្ធខែលការពារមីស៊ីល ត្រូវបានគេបង្កើតឡើងដើម្បីតាមស្កាត់ និងកម្ទេចគ្រាប់មីស៊ីលរយៈចម្ងាយខ្លី មធ្យម និងរយៈចម្ងាយឆ្ងាយ អំឡុងពេលគ្រាប់មីស៊ីលរត់ដល់គោលដៅចុងក្រោយ៕
